شوفوا يا بنات اليوم ح أحكيكم عن عادات أهل مكة زمان في الأكلات واللي ما زالت عند بعض العوايل الين دحين، ولازم تعرفوا إنه لكل أكلة مناسبة تتعلق بيها لأنه نحنا المكاوية وبالذات العتقية لنا تصانيف وتباتيك في الأكل، إيش يعني عتقية يا ستيتة؟، عتقية معناها الكبار في السن عشان كده أنا زهمتكم اليوم عشان أحكيكم عن هادي الأكلات ومناسبتها، وخلوكم معايا عشان لما تكبروا وتتزوجوا تحكوها لأولادكم وبناتكم، هيا اسمعوني وركزوا معايا إيش رايحة أقول، الكابلي أو الزربيان والسمبوسك والطرمبة، هادي الطبخات يسووها وقت المناسبات والزواجات، أما الحريم يجيبوا لهم ميز، هوه كان في ميز على أيامكم يا ستيتة؟، يا حسرة علينا يا هنادي، قال ميز قال، كانوا يجيبوا للحريم من نفس أكل الرجال، بس في بعض الحريم وقت الزواجات يسووا بريك أو بف بالجبنة أو باللحمة، وده يكون شغل بيتي، يعني يزينوا السفرة وفي حريم يسووا كيك بنكهة البرتكان أو الموز عشان يحلوا فيها بعد الأكل، وفي أكلات خاصة بأيام العزاء يعني اليوم الأول والتاني يسووا الرز بحمبص، واليوم التالت اللي يسموه قطع العزا، يسووا الششني والمعرق والمختوم والسقط، وإيش يعني الششني والمعرق والمختوم والسقط، يا ستيتة؟، هادي كلها أكلات بتنطبخ باللحمة وكل أكلة لها طريقة يعني المختوم والمعرق اللي هوه الإدام باللحم أما السقط فهو حواشي الخروف اللي هية الكبدة والكرشة والقلب والكلاوي، بتنطبخ زي الإدام برضو، أما الششني فهو مربى القرع ينطبخ ويسووا منو مربى، أما المعدوس اللي هوه الرز بالعدس وسموه معدوس لأنه العدس بيكون أكتر من الرز لما ينطبخ وهدا يسووه أهل مكة أيام البرد والغيم والمطر، وتسمع الأهالي يقولوا طلعوا القدور السطوح عشان نسوي المعدوس بموية المطرة، ومن جد يا ستيتة يسووا المعدوس بموية المطرة، لا يا روان بس هوه كلام وينقال، والمعدوس يا حبايبي بيتاكل مع الروبيان اللي هوه الجنبري، أو السمك المقلي والحمد لله إنه محنا عايشين في منطقة باردة وإلا حيكون كل يوم طبيخنا معدوس وحتصير بطوننا زي الطبلة، ههههه حلوة منك يا ستيتة، والملوخية الخضراء هادي بيسووها أهل مكة في اليوم الأول من السنة الهجرية من باب التفاؤل إنها تكون سنة خضراء وخير للجميع، هدا غير الحليب بالهيل برضو ينشرب في صبحية أول يوم في السنة الهجرية وكلها عادات من أيام ما حفروا البحر، هدا غير السليق «رز مطبوخ بالحليب»، اللي يسووه أهل مكة أيام ما يكون الجو بارد وما يتاكل إلا لازم يكون مرشوش على السليق السمن البري، ولا ننسى كمان أيام الحج تلاقي أهل مكة مشغولين بالذبايح حق عيد الحج، وما في بيت في مكة إلا بيسوي السلالي والمقلقل وما في شي في الذبيحة يترمي، كل شي يتاكل حتى الرجول، وع وع يا ستيتة حتى الرجول، إيوه رجول الذبيحة تتسلخ وتتنظف ونسوي منها مقادم ويا سلام على فتة المقادم اللي تلم العظم، هدا غير الدبيازة وأكيد إنتو عارفين إيش الدبيازة؟ أكيد يا ستيتة نعرفها، هادي مربى بالمكسرات ناكلها في أول يوم العيد على الفطور، ولازم يكون جنبها الزلابية واللقيمات، وآخر شي حكلمكم عن المجلب، وإيش يطلع ده المجلب كمان يا ستيتة، هدا يا رحاب يا بنتي مجموعة من الأعشاب نشتريها من عند العطارين ونفورها ونعطيها للحرمة اللي تنفس «تولد»، وهادي بعض من عادات أهل مكة، ربي يعمرها وتووتة تووتة خلصت الحدووتة.
