شارع حراء يا حبايب

بالبلدي الفصيح

دحين لما خرجت من البيت مو كنت متعطر ومتبخر ودحين لما رجعت للبيت ريحتك كلها زفر في زفر فين كنت حضرتك جالس في المركاز وإلا جنب كانون الكباب وإلا الميرو وإلا جنب قدر المندي والزربيان؟ لا حول ولا قوة إلا بالله يا حرمة اهمدي وابلعي ريقك خلييني آخد نفسي وألملم رجولي وركبي من طلعة الدرجة وول وول إيه هو ده ... طيب يا سيدي حاضر ودحين غير حوايجك على بال ما أجهزلك العشاء أنا أتعشييييت.. أتعشييييت؟؟!!! أيوه أتعشيت بعدين أصلك أنتي منتي عارفة إيش الحكاية... هات الحكاية يا سيدي ...ياستي كنت ماشي كعابي في شارع حراء وطول منت ماشي في الشارع ده ما تشم إلا ريحة المطاعم عشان كده أنا ريحتي زفره، شارع ياطولو كله مطاعم ومن كتر المطاعم أهالي الحي سمووه شارع المطاعم، المهم هدا الشارع كان ياما كان شارع رايح جي وكانوا أهل الحي مرتاحين وكان بيخدم أهل الحي كلهم وبقدرة قادر من فترة طويلة قفلوا الشارع وخلوه رايح من غير جي ليه ماني عارف، رغم أنه شارع حيوي بيربط مابين طريق المدينة وطريق الأمير سلطان لكن المصيبة مو هنا.. المصيبة إنه أهالي الحي اتضرروا واتبهدلوا واتعكننت حياتهم من حكاية الشارع ده، يعني بالبلدي كده اللي يبغى يخرج من بيته ويروح مشوار يبغالوا يلف من راس الرجاء الصالح عشان يرجع لبيته لفة طويلة عريضة مالها داعي، واللي يبغى يقطع الشارع كعابي يبغالوا يتوضا ويتشهد ويشمر توبه ويحط المتاس تحت باطو ويقول يا فكيك، وإلا حتكون نهايتة في الشرشورة من سرعة السيارات، هدا غير الحريم والأطفال اللي يخافوا إنهم يقطعوا الشارع لأنهم خايفين ينسدحوا تحت كفر سيارة طايشة، أنا عارف إنه كتييير من الناس يقولوا شارع طويل وعريض وحلوو وهما بيقولوا كده لأنهم مو حاسين بمعاناة أهالي الحي نفسه لكن أهل الحي هما اللي متبهدلين من هدا الشارع من كتر المصايب والحوادث اللي بيسمعوا عنها كل يوم، بعدين أنا أبغى إيش اللي يمنع إنه الشارع ده يرجع زي ما كان رايح وجي لأنه شارع مهم وحيوي وبيخدم كل سكان الحي وغيروا من الناس اللي جاييين عليه وكل الحكاية كم حجرة تترص في وسط الشارع من بدايته إلييين دوار التاريخ ويرتاحوا أهالي الحي من هادي البهدلة ووجع الدماغ عشان كده أتمنى من كل قلبي إنه أمانة جدة تشوف حل سريع وجذري لشارع حراء وتريح السكان من هادي البهدلة اللي عاشوها من فترة طويلة لأنه مو معقول شارع حيوي ومهم زي شارع حراء يكون حاله بالشكل ده، وارحموا من في الأرض يرحمكم من في السماء يا أمانة جدة. وعيشوا كتييييير تشوفوا كتييييير.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة