كنافة أم فيصل وشارع جاك

بالبلدي الفصيح

استغرب من أمانة جدة قيامها السفلته لشارع مزبووط ومسفلت أحلى سفلتة وتجي بمعداتها وسيارات صيانتها وهات يا كشط في شارع مسفلت أحلى سفلته هدا اللي حصل في شارع مهم وحيوي في المطار القديم.
ياريت الأمانة أو المسؤولين اللي ماسكين حكاية سفلتة الشوارع يدخلوا الشوارع الفرعيه داخل الأحياء ويشوفوا الهضاب والمرتفعات والمنخفضات.. والله ما تمشي في شارع منهم إلا أنت وسيارتك تتبهدل آخر بهدلة من كتر المطبات والحفريات اللي في الشوارع الفرعية اللي جوة الأحياء وانت يا يا ولد البلد الله يعينك حتروح من ميكانيكي لميكانيكي عشان تصلح عكوسات ومقصات سيارتك لأنك لو رحت اشتكيت الأمانة ما حتاخد لا أبيض ولا أسود وحيجيك الرد البارد منهم هادي شوارعنا وأنت خلي بالك منها ... شي يحزن هدا اللي بيحصل في شوارع جدة الفرعية اللي وسط الأحياء لا والمصيبه انه بعض الأحياء بعد ما تتكسر عشان تصريف المجاري ياريت ترجع زي ما كانت بالعكس تجلس بالشهور الييين تتسفلت وتتصلح وياريت تكون السفلتة مزبووطة إلا تشوف الشارع منفوخ من كل ناحية فيه ومنت عارف هدا اسفلت والا اسفلت معجون مع خميرة عشان كده اتنفخ الاسفلت وهدا كوم وشارع (جاك ) كوم وشارع جاك للناس اللي ما تعرفوا نقولهم هدا شارع موجود عند بداية مدخل الحي اللي يودي على حي قويزه هدا الشارع ما تعرف راسه من رجوله لما تمشي فيه كأنك ماشي جوة عجينة كنافة أم فيصل خيوط رايحه وخيوط جاية وخيوط داخله في بعضها ما تعرف للشارع ده ملامح بس في فرق مابين كنافة أم فيصل وشارع جاك كنافة أم فيصل مافي أحلى منها أنا اتمنى انه واحد من المسؤولين اللي ماسكين تخطيط الطرق يجي يشوف حال هدا الشارع وبعد كده ح يعرف كيف حالة سكان هدا الحي اتبهدلوا آخر بهدلة من اللي صاير في الشارع سيارات رايحه وسيارات جاية وزحام ماله لا أول ولا آخر وحوادث ومضاربات بين أصحاب السيارات يا كترها بتصير لكن لو في تخطيط وتدبير للشارع ما حيكون حال الشارع بالشكل ده لا والمصيبة أنه اتكلمنا عن هدا االشارع مرات ومرات وهرجنا وحلقونا نشفت ونحنا نتكلم ونهرج ونقول يا حبايبنا يللي في الأمانه شوفوا حل في هدا الشارع لكن ما عندك أحد اذن من طين واذن من عجين عشان كده بتكلم وأقول بالفم المليان وللمرة المليون يا مسؤولي أمانة جدة شوفوا حل لشارع جاك وخلوا سكان الحي يرتاحوا من هدا الغلب والهم اللي بيعيشووه كل يوم في حياتهم.
واللهم أني صايم وعيشوا كتييييير تشوفوا كتييييير
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة