أحزان شخصية

ياليل ماني وحيد ان غابوا احبابي
معي قصايد حزن واحلام وردية
ياليل كان الحضور يمون بغيابي
من يحضن السفن لا شحت موانيه
قبل امس ضاق المدى واهديت لترابي
دمع شرح قصة الدمعه وراعيه
كان المسا في بلادي يتعب اهدابي
وحزنه كسر خاطري واعلن وداعيه
مشهد لبسني وعراني لجلبابي
قلت اكتبه من فرح ف ابيات مرثيه
مقهى وكرسي قديم وشيخ متصابي
واجساد مالت عبث وأنغام غربيه
فوضى تعم المكان وصوتها نابي
وتشوف موت الجماعة ب الانانيه
هنا رميت الجسد فاهم ومتغابي
في زواية تحترم فيها الخصوصيه
هنا ذكرته غريب مر من بابي
يحمل جواز السهر واحزان شخصيه
ناديت له ياغريب ان جيت لاعرابي
يقريك قلبه وتسكن روحه الحيه
غامض وسحره فعل فعله وخلابي
جرح يشيب الزمان وباقيٍ غيه
يمر مثل النسيم ويقبل عتابي
ويروح له سيرة تذكر ومنسيه
اعطاني احساس لين الشوق غنابي
واطلق عنان المشاعر للرومنسيه
امشي معه للنهاية قبل يبدابي
وأسامحه لو يقول أعذار وهميه
اعرف عشقت المحال اللي تعدابي
حدود مالي بها مسكن وجنسيه
ايقنت باني تركت اوطان واصحابي
في رحلتي ماحسبت احساب للجيه
اسهبت ادور عن الغياب بكتابي
واحفظ امانة واسلمها حراميه
ماكان عندي سبب لوتكثر اسبابي
مامربي قالته روحي بعفويه
اشيا حسبها القدر من واقع حسابي
مع ان نفسي طبيعتها حياديه
خذيت منها لقب ينضاف لالقابي
شاعر عشق في ظلام الليل جنيه
* سعيد العمودي