بيت وصدى

الاسبوع الماضي كان بيت الاسبوع عن مقترح الاخ خالد الطيار حول موضوع الاهانة التي يتعرض لها المعلم من قبل الطلاب، للشاعر فهد بن عقيل الطويان من بريدة، ويقول:
معلمك له حق يا طالب اليوم
يلزمك تقديره وفاء واحترامه
وكان الصدى من الشعراء
طاعة مدرس حصتك فرض ملزوم
يلقابها الطالب هدفه ومرامه
شف الذي شايل علي متنه نجوم
نتيجه من الجد ويازن كلامه
لو كنت ماخذ من الشهادات دبلوم
استاذك اكبر سن واكثر علامه
سعود عبدالعزيز الهزاع – نعام
حق المعلم يا ملا حق معلوم
نور طريق الناس علم وعلامه
حقق لطلابه معاريف وعلوم
والواجب المفروض نرفع مقامه
دوره كبير باقي دايم الدوم
حقه على الطلاب تسمع كلامه
عبدالمحسن بن محمد المحيسن
الوقت دارو اختلف وقتنا اليوم
وصار المعلم يتمنى السلامه
ما عاد له هيبه ولا هوب مليوم
حسابه عسير لو ينقص علامه
نبي نظام يكتفل حق مضيوم
والطالب الى قال نفهم كلامه
حمد عبدالله الوايلي
ترى المعلم لو قسا فيك ملزوم
تطيع لمره قبل يوم الندامه
وابشر ترى يفزعلك بحرف ورقوم
لجل الفهم ساق الهمم بالكرامه
علم وادب وسلوب وفكار وعزوم
حتى تبين من على راس هامه
كاد ان يكون الكم رسولٍ بمفهوم
هذا المعلم عظم الله مقامه
محمد زايد الحزيمي
حق المعلم اصبح اليوم مهضوم
وقليلٍ اللي حافظن له مقامه
واللي يهين معلمه يلحقه لوم
من دينه اللي يا مره باحترامه
وان ما ندم على اهاناته اليوم
يذوق لو بعد السنين الندامة
عبدالعزيز الصالح - حائل
قدم له التقدير مع طيب السلوم
لا من عطاك الدرس فافهم كلامه
حذرا من الغفلات واحذر من اللوم
واحرص على الطاعات قبل الملامة
يسعى من اجلك ياولد دايم الدوم
هذا المعلم مخلص(ن) باهتمامه
محمد بن عبدالعزيز الخنيفر
من زودك بالعلم لو هو من الروم
زد له من التقدير وارفع مقامه
خلك وفي ترى الوفي دايم الدوم
يشوم للعليا ويرقا سنامه
معامك له حق ياطيب القوم
نور لك الطريق وابعد ظلامه
بدر الحزيمي
بيت الاسبوع
تجاوبا مع مقترح الأخ علي الدهري حول عدم وجود تأمين طبي لموظفي الخدمة المدنية ارسل للصفحة الشاعر حامد الغالي هذا البيت
ليه الموظف ما له اليوم تأمين
راح المرتب للمشافي رهينه
نستقبل صدى هذا البيت بثلاثة أبيات فقط تدور حول هذه القضية الهامة
ويفضل الإرسال عبر الإيميل rb-khozama@alriyadh.com
او على الفاكس (4871070/ 01)
مقترح لموضوع بيت الأسبوع المقبل
بعث للصفحه الاخ عبدالعزيز الصقير مقترحا لموضوع بيت الاسبوع القادم وهو ضرورة وضع تسعيرة على المواد الغذائية أسوة بتسعيرة الادوية