بيت وصدى

الاسبوع الماضي كان بيت الاسبوع من طرح الشاعر فهد عقيل الطويان حول موضوع بقاء الأسعار على الغلاء وعدم نزولها حتى بعد الدعم والبيت يقول:
ياهل الطمع هو وين تخفيض الأسعار
ما فادكم دعم السعر والمواني
وقد تجاوب مع البيت والمعنى المطروح الشعراء:
يارب انا طالبك تخفيض الأسعار
السوق طار وراتبي ماكفاني
البارحه وقفتلي عند عطار
ابشري الكمون قال اليماني
ما تدري ان السوق يالاجودي طار
من عقب ما هو خمس صار بثماني
حسن بدر خلف العنزي
ياهل الطمع ترى الطمع هدم الاعمار
يهد عالي شامخات المباني
صرنا معاكم صاحب الغار والنار
ماله طريق يوصله للاماني
عسى السحاب للي نشأ عصر مدرار
يسقي الديار الممحله في ثواني
بدر بن خلف الحربي
الناس مظلومه وبالحل تحتار
كل يقول التاجر اللي كواني
شي غشانا بالقديمات ماصار
حتى ولا شفناه عصر السواني
الله يحل الوضع ويجيب الامطار
ويحقق المطلب بعدة ثواني
علي رشيد الرشيد رياض الخبراء
زدتوا النصيفه واصبح الكل محتار
وخليتوا المسكين دايم مداني
كلن على كيفه بلا سابق انذار
وين الرقابه والله المستعاني
شي غريب كيف يا ربعنا صار
نلقي الزيادة بين بضعة ثواني
محمد بن عبدالعزيز الخنيفر أشيقر
عسى الملك محفوظ من الشر ومجار
ساهم بدعم للجمارك واعاني
عشرين بالميه لحليب في الأخبار
والرز ساعد به كريم اليماني
وتعنتو بالزود واصروا اصرار
الله يعين اللي معاشه ضماني
سعود بن عبدالعزيز الهزاع نعام
يا أهل الشيم يا أهل المبادئ والافكار
تكفون في حل (ن) يعيد التزاني
حنا هلكنا من طمع بعض تجار
وشلون حال اللي فقير(ن) يعاني
حتى الطحين الظاهر انه بعد طار
الله يستر وش علام الزماني
محمد بن دحيم الحبردي - الزلفي
ياهل الجشع خليتو صاحب العقل يحتار
مارحمتو حال الفقير المعاني
ابا لي من هل الطب دكتور بيطار
ابيه يعرف علتي والي شواني
ونباه يحاسب كل من كان غدار
ابن البلد الي باعني وشتراني
فيصل البدراني
ما عاد ندري وش بلاء الناس وش صار
صار السعر متزايد في ثواني
يوم الجشع بأهل الطمع زاد معيار
زاد وطغى في كل وقت وزماني
لا رادع يردع جشع عند تجار
من جورهم صار المواطن يعاني
سعود بن سعد الحافي - الرياض
بيت الأسبوع
بعث به للصفحة الشاعر بدر بن خلف الحزيمي تجاوباً مع مقترح الاخ مبارك محمد الضعاوين حول موضوع المسابقات الشعرية والأهداف المادية عبر القنوات الفضائية والبيت يقول:
من يفك الشعر ديوان العروبه
من يدين مضخرينه للتجاره
نستقبل صدى البيت بثلاثة أبيات فقط حول الموضوع المطروح على الفاكس 4871070أو الايميل: Khozama@aLryadh.com
مقترح لموضوع بيت الاسبوع القادم
بعث للصفحة الأخ خيرالله منير الشمري مقترحاً لبيت الاسبوع القادم وهو موضوع عدم استقبال المستشفيات الحكومية للحالات الطارئة وعدم وجود أسرة كافية.