في جنة الفردوس الأعلى تجازيه

ما قدر الخالق على العبد ياتيه
الموت حق مقدرٍ بالسويه
يوم الخميس الظهر مانيب ناسيه
وقتٍ أصاب أبوي سهم المنيه
فاربع عشر هجري توفى وننعيه
بشهر محرم عقب شهر الضحيه
سلمان ليت الدمع ينفع ونبكيه
نبكيه كل الوقت صبح وعشيه
لا شك أمر الله وانا خوك راضيه
أمره على خلقه وثابت مجيه
أبويه فعوله صعيبه وبرثيه
راع العلوم الطيبه والسخيه
ومهما أعدد له سجايا فلا احصيه
افضاله لناسٍ والاخرى عليه
كل الخصال الطيبه تجتمع فيه
مخبوره فعوله ولا هي خفيه
من جاه في لازم يحله ويقضيه
يروح من عنده ونفسه رضيه
وليا طلب شي منه ما يعييه
إن كان سلفه منه ولا حذيه
محصلٍ للنعم لا حل طاريه
من شبته ما سار درب الرديه
ريف بوالدينه كثارٍ حسانيه
وتنفق يدينه كرمةٍ حاتميه
الحشو والخرفان ضيفت طراقيه
ودلال رسلانٍ على النار حيه
والعود الأزرق جايبه ومتنقيه
غال الثمن مشري بربطات ميه
كريم فالضيفه قليل مجاريه
بحر الكرم ايداه دايم نديه
ماحدٍ خبرنا ما يحبه ويغليه
له منزله عليا وله مقدريه
مشهود له بالخير والفرض مديه
وفالمرجله دايم عزومه قويه
إن قام في مشكل يحله وينهيه
ينهيه بالحكمه وطيب النويه
بين القبيله قام بالصلح يطفيه
بملاسن الشعار كف الأذيه
جيرانه الأقصين واللي حواليه
دسم شواربهم بكرمه هنيه
لا شافه له جارٍ نزل ما يخليه
قدم له الواجب بنفسٍ رضيه
بغزو الكويت ووقت جيت بنيخيه
زهم علي ربعه وجوفي شويه
استأجر الهم بيت واسع مبانيه
وأثث جمي البيت من كل شيه
وجمع لهم ما جادت النفس تعطيه
وشراء لهم فله بجزل العطيه
ويصبر على من زل ولا يعاديه
يدمح خطاه ولا يكيل الرديه
يالله من النيران يا رب تنجيه
تجعل له الجنه بصحبه نبيه
في جنة الفردوس الأعلى تجازيه
تسقيه من كوثرك شربه هنيه
ويالله عسى التوفيق يشمل ذراريه
يا خالق الأكوان رب البريه
عبدالله فيحان هاجد العتيبي