نعطيك بيعتنا ونحلف لك إيمين

جاني خبر واثر الخبر ياعرب شين
والعلم الا قشر والله اني ماادانيه
قالو لي ان الموت في صبح الاثنين
اخذ ابو فيصل بتقدير وإليه
قلت آه هلي صافي الدمع ياعين
ابكي على فهد العرب يوم نرثيه
مات الزعيم اللي حمى حوزة الدين
هلي عليه الدمع ياعين وابكيه
يانفس عقبه كيف يانفس تسلين
وهو الذي كنتي تحبين طاريه
مات العطوف اللي يحب المساكين
مات الذي بالطيب ما احد يجاريه
مات الجواد بحزة العسر واللين
مافيه حي بالوهايب يباريه
مات الذي للشعب اوفى الوفيين
والشعب بالغالي وبالنفس يفديه
صحيح حنا بدبرة الرب راضين
بس الفهد غالي وبالحيل نغليه
موته فجيعه ونزلت بالملايين
جل المصاب وياكبر حزننا فيه
والله لو نبكيه حين بعد حين
على ربع فعله فلا اظن نوفيه
الحزن خيم في قلوب المسلمين
وشلون ينسونه وجملة حسانيه
يالله طلبتك ياكريم الكريمين
يامن تصاريف المخاليق بيديه
يا الله يا خالق ابن ادم من الطين
ترحم فهد وبغاية الخير تجزيه
يا الله عسى قبره رياض ورياحين
ويا الله عسى الرحمة تحوطه وتكسيه
واحشره مع زمرة عباد مؤمنين
واجعله بالجنات والحور تاتيه
ويا الله ياوالي لا بو متعب تعين
وتوفقه وتسانده في مماشيه
حنا يابو متعب على العهد ماضين
ونسأل لك التوفيق والخير نرجيه
نعطيك بيعتنا ونحلف لك يمين
انا رجالك كل ما قلت نمضيه
انت وولي عهدك وكل الميامين
لكم ولانا والوفا اليوم نبديه
والله يخليكم لنا سنين وسنين
وحسودنا فيكم عسى الله يعميه
ثم الصلاة عداد نبت البساتين
على نبي وضح الله مساعيه