جيتك عقب بذ الخفا يابس الريق الجية اللي ضيع الله جهدها

طرح بيت الأسبوع الشاعر محمد عياد والذي يقول:
جيتك عقب بذ الخفا يابس الريق
الجية اللي ضيع الله جهدها
تلفيق بعض الشعر ياناس تلفيق
بس البيوت اللي تجاري وحدها
ما جاري إلا بيت حكمه وتشويق
أتعب على تفنيدها واعتمدها
يشوقني بالحيل بعض الطواريق
قواعده صلبه وملس عمدها
عبدالعزيز الصقيري - حايل
من عقب صدٍّ ما هو لمثلي يْليق،
ضيقات صدري ما تلاشى عددها.
كنت أحسب إنّي في توالي الطواريق،
أبا امسك أهدافي الكبيرة بيدها.
وأثر الظنون لها ضياع وتفاريق،
ما هوب لازم تنوجد في وَعَدها.
ولا لها توجد عهود ومواثيق،
دنياً عسى ربّي يخفّف نكدها.
محمد المقحم - الرياض
بيت يجي مليان حكمه وتنسيق
من قوة المعنى وفكره رصدها
لبعض السلوب أحيان تكره ولا تطيق
وبعض السلوب أحيان يبطي نكدها
مجاراة من يقطف زهور الزماليق
ياشاعر للمفرده مفتردها
عواد الزبده - حايل
لا بَارك الله فِيك ياحْزة الضِيق
فِيها تَناصِينا خْلايق وعَدهْا
يامْا تَجمعنْا ويَاما تِفارِيق
ويَامْا تناطحنا لِيالِي مْهدهَا
هذا كَلام القُول والفِعِل والخِيق
اللِي لِيا مِنه جَته فِي عْهدها
لكنِي حِميا وعِشقي أبْاريِق
لو عِلتِي مَحدٍ مِن الناس اردها
خِذها يبو عَياد والوِجِهه بِقَيق
أمَا تِصْيب القُوم والا سعدها
محمد بن حمد المجنوني
بعض العرب لاجيت تشكي من الضيق
وهموم صدرك زايده في مداها
خيلت فيه بعلم خير وعلوم الصديق
قام يتلوى بسالفه قد بداها
وأخير منه اللي يسابق على الرفيق
يشيل حمله يفتديه افداها
ومالك غير اللي بيده الخير ويسيق
الواحد المعبود نفسك هداها
حمد عبدالله الوايلي - حوطة سدير
بيت الأسبوع
كتبه للصفحة الشاعر غنة العطاوي ويقول:
ياهل الشعر وأهل المثايل والابداع
ترى القصيد الجزل مثل الأمانه
نستقبل صدى البيت خلال ثلاثة أيام من نشر البيت المطروح على إيميل الصفحة:
rb-khozama@alriyadh.com