القصيدة للشاعر الهذيلي وهذا نصها

الضبعان في رسالة عاجلة:

المكرم الأخ/ الحميدي الحربي المشرف على مدارات شعبية بصحيفة الجزيرة حفظه الله
إشارة إلى سؤالكم عن القصيدة التي مطلعها:
يا ما حلا القيلات باطراف حايل
بظلال طلح والمكيف طبيعي
أفيدكم انها للشاعر الشيخ: عبدالمحسن الهذيلي من أعيان مدينة الروضة بمنطقة حايل..
ياما حلا القيلات باكناف حايل
بظلال طلح والمكيف طبيعي
بكناف حايل والجبال الهوايل
اللي كما الجوهر حصى كل ريعي
لا صرت بين اللغف دام المسايل
جليسك السبهان ولا القويعي
بديار شمر كاسبين النفايل
اللي لهم عصم الشوارب تطيعي
بجاء وسلمى مكرمين السبايل
امجادهم من قبل دور المنيعي
أهل الجبل وافين ياكال كايل
ولولا الثنا كان القدايم تضيعي
مافيه شك ولا نبي قول قايل
وحشا معشي الذيب فعله يضيعي
وراعي جفيفا من خيار الدلايل
وغضبان والمجفي وولد القفيعي
وياما وياما لو نعد الفضايل
ما يحصي الكاتب لها والمذيعي
وادخل على الله ما نسب القبايل
مار ان شمر لي ربوع وذريعي
مناثر البن الحمر كالنثايل
عند البيوت اللي قراهم سريعي
اهل المناوخ بالسنين السحايل
ترفع لهم بيضٍ بصوت رفيعي
وصلات ربي عد ماقال قايل
على النبي الهاشمي الشفيعي
أخوكم الشاعر
صالح بن عبدالله حمود الضبعان