اللي يعرف السيل ما يواجه السيل يبعد عن دروبه يخلي طريقه

يا مْخَالِفٍ صوت العَقِل أنت غلطان
أنت الذي بْيِمْنَاه ينتخ عيونه
عن نصْح من ينصحك سدّيتَ الآذان
عدّيت نصْحِه من قبيل المهونه
تعْبر دروب الموت من دون حسبان
موْقفْك بانت بهْ مواري الرّعُونه
ابْموترك غامرت والحين بلشان
محتاس تبغى من يمد المعونه
السيل ما رده شجاعٍ بذرعان
يا كمّ قومٍ شلهم في ضُعونه
لا تشتكي وتْقول حظي كِبَا وْخان
العقل نعمه سِعْد من يملكونه
سببت جرحٍ للمحبين وأحزان
لأصبح ولدهم جثة يقبرونه
ناصر جمعان آل عوض -
وادي الدواسر
موترك ماهو مزبنك حزّة السيل
انزل عن الشنطه وازبن على الجال
لو ينجرف شبرين رحتو كما قيل
روحت مقيطٍ في قليب على حبال
السيل ساوى بالعقوم الدراكيل
ما ينطحه يا كود الرواسي من جبال
ان طعتني انفذ بجلدك عن الليل
لا يقتفي ذا السيل ماطر من خيال
سعود عبدالعزيز الهزاع - نعام
ترى التهوّر يا هل العرف مذموم
ما يفعله يا كود من ضيع الدرب
تدخل شعيب والسماء كلها اغيوم
والسيل من تحتك مثل داخل الحرب
خسران من يمشي على خطوة البوم
يصير ندمان الى رافق الجرب
علي الرشيد - رياض الخبراء
الحمد لله والشكر يا هل سدير
طاح المطر والسيل يمشي بمجراه
واللي على الشنطه يسوق المعاذير
ماحسب حساب المطر والغرق جاه
السيل نعمه لكن يبغى المحاذير
اخذ الحذر ملزوم عسى الله ياقاه
عجز الدفاع يحذر الناس تحذير
وبعض البشر ما كان براسه سواه
خالد ناصر المخيمر - روضة سدير
توتر وغرّد وأرسل السيل صوره
وإليا قضيت اوقف على شنطه المور
شكلك غشيم وحاذر الوقت دوره
مبسوط ولربعك تبي تعطي الشور
عبدالكريم النغيمشي - لوذة
فكّر بدربك وانتبه لا تحيدي
شاور رجال العرف حتى تدلك
انته تحب السيل تصبح سعيدي
وإليا دخلته تفقد أهلك وخلك
هذي نصيحه جاك علمٍ وكيدي
نصيحةٍ تاتيك لمنهو يجلك
محمد عبدالعزيز الخنيفر - أشيقر
الغيث شفنا فرحته بشتى الوسايل
وسر القلوب برعده وبروقه وسيله
وريح الخزامى والنفل وسط الخمايل
ونسايم من كلَّ منحاتٍ عليله
ويازين روضٍ مخصر بعد المخايل
وتلاعج البراق في وسط المخيله
وبنت المطر من بعد فترات طويله
جمالها شفناه بالأرض الجميله
سعود عائش الحربي - جدة
عم الفرح والخير في كل الاوطان
سالت جميع الأوديه والخباري
ترى السلامه مطلب اليوم وأمان
وما ينكتب للعبد ملزوم جاري
كم من توهق راح لو كان بطران
خلوا التحدي يا بشر والهقاوي
اقولها من جد ما نيب غلطان
خلوا التهقوى والبطر والتمادي
ألطف بنا يا رب يا عالي الشان
انت الوحيد اللي عليه اعتمادي
خليف فهيد الحربي - الرياض
حب المطر في قلوبنا ماله مثيل
نفرح بأخباره وإذا جاء حقيقه
كلٍ يبشّر به وتحلى الأقاويل
وإذا نزل خيره يعم الخليقه
واللي يبي الكشتات حذاره بالحيل
لا ينوخ ركابه بأرضٍ عميقه
اللي يعرف السيل ما يواجه السيل
يبعد عن دروبه يخلي طريقه
السيل مثل البحر لاهاج به ويل
وإذا اندفع يجرف ولاشي يعيقه
ولو حذروا الأرصاد عنهم فلا تميل
تسلم وتنجا من مياهن غريقه
صالح علي المبارك - حوطة سدير
إليا صك الخيال مدلهمن أسود
إلزم مكانك ترى مابه شجاعه
عطا معطي عطانا وكثر
شعبان تحدرت من عالي رفاعه
وش لزومك ليش تخاطر بنفسك
يا مدور الخساير واللواعه
عبدالكريم العبيداء - حائل
المخاطر ماله اعداد وكثيره
والاوادم بعضها ما يفهموني
والسيول اليوم يا ربعي خطيره
وافهموا منّي عساكم تسلموني
من يريد الخير يفهم في مسيره
فكروا ثم فكروا لا تندموني
لا نويت الدرب فكر في يسيره
والتهاون ما خفاكم تعرفوني
ريان محمد الخنيفر
صورة العدد (عدسة / خالد السليمي)