صوت الصورة

الجيب .. والعزبه .. والاصحاب جلاس
جلسه على كيفك .. على شط وادي
ابعد عن الضجه .. وعن زحمة الناس
ترتاح لك يومين في جو هادي
فيصل بن محمد بن سيف - الدلم
يا زين مكشاتي بوسط البحيره
والسيل حايف مع جميع الجهاتي
يهب نسناس الهوا مع عبيره
ويطيب شرب الكيف بالمبهراتي
خالد بن ناصر المخيمر - روضة سدير
السيل نعمه وفيه أخطار
ياليت ربعي يشوفونه
القدر منصوب فوق النّار
بين المغادر يسوونه
عبدالكريم عبدالرحمن السلوم - القرائن
يا موطن الامجاد بالغيث مبروك
والسيل يقفاه النفل والخزامى
والاوله يسلم هل الجيب شيروك
مع عشب ترتع به نياق النشاما
سعود عائش الحربي - جدة
ما يامن السيل الا من يأمن الحيه
والسيل والحية ما احدٍ يأمنها
يا سعود بالله علم هواة البريه
لا تجلس والسيل من اسرها وايمنها
محمد سعد الجروي - الرياض
يا سعود خبرهم ترى السيل غدّار
في موقعٍ مخطور والله غريبه
ولا تكثّر الطلعات في وقت الامطار
إلزم مكانك لا تصير المصيبه
محمد بن عبدالعزيز الخنيفر
واهني اللي قعد جنب الغدير
حاكراً الكيف هو ويا خويه
مستريحٍ بالهم عقب المسير
شاكرين ربهم .. رب البريه
مشاري الغنام - ثادق
حول الغدير وكامل العفش موجود
في موقعٍ وسط المياه الغزيره
ترى الحذر واجب وخلك عن الزود
تحط نفسك في مشاكل وحيره
علي رشيد الرشيد - رياض الخبراء
الموتر اللي يعجب الفكر ممشاه
بوسط الجزر واقف ما بين النشاما
من وارد اليابان حنّا شريناه
نبغاه للرحلات سيفٍ احساما
فارس فاضل الطلوحي
يالكشوت اللي على شاطي الراحه
تبون الأناسه والخطر لا يداهمكم
توخ الحذر والطقس وان هبت أرياحه
توخ الحذر في ساعةٍ لا تحيط إبكم
غازي بن قاعد العتيبي_الدوادمي
ياسعود حذرنا وصحنا بالأصوات
عن الخطر دوّر طريق السلامه
الجيب ما ينفع في بعض الأوقات
احذر من الفرحه تصير الندامه
حمد عبدالله الوايلي - حوطة سدير
يا نازل الموقع ترى فيه الاخطار
ارحل ترى الما كل ما له يزيدي
فعلاً ترى موقعك ساحر الانظار
لكن اخاف تقول ما هيب بيدي
محمد صالح الاطرش - رياض الخبراء
ياللي نويت الصيد وأصبحت مصيود
البحر ما يومن بجزره ومده
مالك يكود الصبر مع هبة النود
ودرب سلكته أطلب الله يرده
سعد بن سعود الخالدي
صورة العدد
نستقبل مشاركاتكم الشعرية على إيميل الخزامى:
rb-khozama@alriyadh.com
أو الفاكس رقم: 4871070 زاوية (صوت الصورة)
ونرحب بالصور الهادفة والطريفة .. ويا هلا