صوت الصورة

يا اللي بوسط السيل ماهر وسباح
وتسلي الخاطر وتغبى الوناسه
احذر ترى ماكل الايام بفراح
يمكن تعوّد فرحتك في تعاسه
نواف بن محمد الدوسري - الأفلاج
لا تقرب الشعبان في وقت الامطار
كم واحداً مثلك تهوّر وفاتي
ترى الحذر مطلوب في وقت الاخطار
كيف السباحه بين طين .. وحصاتي
عبدالمحسن بن محمد المحيسن - رياض الخبراء
صورة العدد الماضي
لا تهاون بالسباحه في السيول
كم قويٍ راح في لمحة بصر
للسلامه عرض والاخطار طول
والعمر محدود زايد أو قصر
عبدالرحمن بن مدلول - رغبة
الذكي يحسب حساب الاخطار
ما ينطح عدوه بدون سلاح
والغشيم يدبس سيول الامطار
حتى لو كان ماهر وسباح
محمد سعد القحطاني
من فرحتي انقز وانطنط على السيل
واثني على اللي يعطي العبد برضاه
يا تلعتي عندي ولا ازرق النيل
يا زين شكلك بين طلحٍ وقرضاه
عبدالكريم النغيمشي - الربيعية
كانه جديد السيل لو كنت سبّاح
فعلك خطر لوا لهدف منه صوره
ياما هلك بالطين في وسطه أرواح
كل ما جهلت الارض زادت خطوره
فهد بن عقيل الطويان - بريدة
سبّاح ماهر يتقن الغوص فنان
يقلب كما طيراً تعلم على الحوم
وصاحبه مبسوط لفعله وطربان
واللي صور الصوره وقرب الزوم
خالد بن ناصر المخيمر - روضة سدير
السيل يا سباح ماهوب مامون
يجرفك سيلٍ مشى مع مسيله
قفزت مثل اللي من لعقل مجنون
والسيل من وقف بدربه يشيله
هادي شبيب الدبالين - الخرج
سالت بلدنا نحمد الله على الخير
الله رزقنا الخير في كل الاقطار
هذى النعم يا ناس تحتاج تقدير
ونبي الحذر يا ناس عن بعض الاخطار
محمد بن عبدالعزيز الخنيفر - أشيقر
السيل جارف يا فتى الجود هوّد
أخشى تصير الفاجعه في دقايق
كم واحداً عقب الدله يوم زوّد
صفوه تكدّر والفرح صار عايق
حمد عبدالله الوايلي - حوطة سدير
يا مز حلقن فوق هالشلال
سبّاح واتلاعب الامواجي
أنا أشهد انها مهنة أبطال
يا ليتكم ابعين الافلاجي
عبدالكريم عبدالرحمن السلوم - القرائن
على الظهر يسبح بشلال ذي السيل
غدير صحي مصدره زخ الامطار
سيلٍ تفيض به القلت والدراكيل
بمجراه تحيا المنابت والاشجار
سعود بن عبدالعزيز الهزاع - نعام