بيت وصدى

الأسبوع الماضي كان بيت الأسبوع من طرح الشاعر عبدالعزيز علي الصالح من حائل حول موضوع معاناة المعلمات المعينات في القرى والهجر النائية والذي يقول:
الله يعين معلمات القرايا
كل يوم أهلهن بانتظار ومخافه
وكان صدى الشعراء رائعاً:
الله يعين معلمات القرايا
اللي لهم في كل يوم طرافه
غربه وحوادث بيّنات وخفايا
والنقل ما من نقل قبل الكلافه
مشاكل واجد بعضها قضايا
في حاجة للحل رحمة ورافه
مبارك بن محمد بن طرجم - وادي الدواسر
أكثرهن اللي كاتبات وصايا
وياكثر من منهن عملها تعافه
كل يوم تال الليل يمشن سرايا
بين العمل والبيت بعد ومخافه
فرض التقاعد حل فيه المزايا
فيه البطاله تنتهي والكلافه
فهد بن عقيل الطويان - بريدة
تقلدن أكفانهن للمنايا
نسوقهن للموت والله حسافه
خوفوا عليهن لا يصيرن ضحايا
زحمة طريق وغير بعد المسافه
تكفون شوفوا حل ياهل النخايا
عبر التناقل ما عليكم كلافه
فلاح الدغيم - الزلفي
عند الدراسة كم حلمنا بمزايا
وبعد التخرج آه ياهي حسافه
صرنا نداوم بين خوف ومنايا
من السكن الى مكاني مسافه
والراتب اللي صار كله فدايا
هذا جوابي بالخزامى اضافه
حمد عبدالله الوايلي - حوطة سدير
بمعلمات الجيل خير الوصايا
حلوا مشاكلهن وقدر أو مرافه
متعرضاتٍ بالطرق للمنايا
وعما يعانن كم كتب بالصحافه
وفي دقة التخطيط وصدق النوايا
بكل صدق.. لا مجامل مخافه
سعود عائش الحربي - القاهرة
قالت على التعيين هذا منايا
وندمت على ما صار لا واحسافه
الله عليم بحالتي والخفايا
ياما من الأخطار وكثر الكلافه
شفت المشاكل مع كثير القضايا
وفي كل رحلة زاد قلبي ارتجافه
محمد عبدالعزيز الخنيفر
دايم مشاكل فيه جميع النحايا
والحل ما يصعب على أهل الحرافه
والنقل محتاج لبعض المزايا
فيه كل يوم يقطعون المسافه
بالرغم من كثرة ورود الوصايا
يصدر نظام مايبي له كلافه
علي الرشيد - رياض الخبراء
الله اللي عليم بسر كل الخفايا
ربنا ربنا نطلبه حنا نخافه
الله اللي خلقنا هو جزيل العطايا
كم نعاني من الاخطار غير المسافه
كم بشر قبلنا يا ناس راحوا ضحايا
الله اللي ترا أمره بين نونه وكافه
سعد صنهات السهلي - الدرعية
بيت الأسبوع
حول الموضوع المقترح الأسبوع الماضي وهو الحذر من التهور في النزول للأودية والسيول فقد أرسل للصفحة الشاعر صالح بن عبدالله الجلعود من القراين هذا البيت:
حذرا من المطمن وحذرا من السيل
وحذرا من الوادي يدربيك سيله
نستقبل صدى هذا البيت بثلاثة أبيات فقط تدور حول موضوع خطر السيول والأمطار والمستنقعات وذلك على الفاكس 014871070 ويفضل الارسال عن طريق الإيميل rb-kozama@alriyadh.com.
مقترح لموضوع بيت الأسبوع القادم
بعث للصفحة الأخ فخري الحربي من الرياض مقترحا لموضوع بيت الأسبوع القادم وهو مشاكل الخدم في المنازل.