السياري يعيد ل«الثلاثيات» توهجها

من شعر المراسلات

لا يخلو شعر المراسلات أو «الاخوانيات» من اللمسة الإنسانية.. وإن كان شعراء هذا العصر قد انصرف كثير منهم عن هذا الفن.
والشاعر المعروف عبدالله السياري قد اختط ل«الأخوانيات» طريقاً آخر يناسب هذا العصر، فبينه وبين الشاعر المعروف عبدالله السلوم والزميل الحميدي الحربي إخوانيات نالت استحسان القراء حتى سميت ب«الثلاثيات الموسمية» وفي هذا العام أعاد السياري لتلك الثلاثيات توهجها من خلال هذه الأبيات التي تجسد بعض هموم إنسان هذا العصر الذي أخذته مشاغل الحياة عن الكثير من واجباته الاجتماعية، حيث يقول السياري:
ألا يا مرحبا باللي نسوني من ثلاث سنين
خذتهم عني الدنيا وأنا والله ما أنساهم
بديت أخجل من اللي ينشدون افلان وينه وين
ربوعك يا أبو خالد وينهم ما عاد شفناهم
وهم ذخري وهم فخري وعيدي شوفت الاثنين
وأنا لي شفت شيٍ جازلي قمت أتمناهم
علامك يالحميدي من ثمان شهور مع شهرين
تعدانا لربعٍ يذكرونك ما تعداهم
ذكرت أو ما ذكرت العذر باطل والقطاعة دين
عيالك لو يجون مسيرينٍ ما عرفناهم
وأخوك اللي من أول زين صار اليوم مثلك شين
نسينا أشباه أبو عابد مع اللي قد نسيناهم
أظن أن القطاعة تنتقل من زيد يم حسين
عسانا لي بغيناهم نسلم بس نلقاهم
عبدالله السياري
وهذا رد الشاعر عبدالله السلوم:
هلا بك يابو خالد والمعاتب شيمة الوافين
وحنا ما نبيع الطيبين إلى لقيناهم
لنا ميزٍ نميّز به ونفهم غاية الغالين
ولو زعلوا علينا وظلمونا ما ظلمناهم
وأبو خالد من اللي عندنا بين الجفن والعين
غلاهم فارضه قدر الرجال وطيب مبداهم
عسى هاك القبال اللي ليا جيته ففالك زين
يدوم له البقى والناس نعرفهم بسيماهم
وأنا عذري يبو خالد تشوفه حق شوف العين
مشاغل هالعمل والصابرين الله يجزاهم
ولكن الحميدي يستحق تقاطعه عامين
مدام أنه يجي ربعه ورا الباقين ما جاهم
هذا ردي على اللي حط لومه داخل القوسين
إلى ما الله هدى بعض الأوادم ما هديناهم
وهذا رد الزميل الحميدي الحربي على قصيدتي السياري والسلوم:
هلا يا مرحبا باللي عليْ رغم الغلا قاسين
ياما الطفهم بحال.. وحال لا والله يا ما اقساهم
إلى من وجهوا غاراتهم.. قلت الخراج منين
أسايرهم مساير.. لو قصوني ما أقدر أقصاهم
أبو خالد جمعنا بالعتاب.. وميّل الحملين
يقول أصحابي الوافين .. عني ويش سلاّهم
سؤال ظاهره ورد وعبير وباطنه سكين
على ما قيل شخَّص داهم.. ولا حدد دواهم
وابن سلوم علّق بالعمل عذره وقال: يمين
وخلاني رهينه.. بين سيّتهم وحسانهم
وأنا لولا الزلل قلت إنهم بالعمل متواصين
عليّ مثبتينٍ حكمهم قدام شكواهم
بذهني شي.. لكن ما يكمِّل غير في بيتين
وأنا تلميذهم بالشعر.. وشلون أتخطّاهم