اللغز

كان كاتب لغز الاسبوع الماضي الشاعر محمد فرحان الفهيدي الحربي من القصيم ويقول:
الا ياويش شي ما يشوفه مبصر العينين
ولكن العمى شافه وميز فيه الاوصافي
علومه حيرتني ما عرف مصداره من وين
ويخلفن الوعود وقيل فيهن موعدن يافي
وقد توصل للحل شعرا
لغز الخزامى مثل خضر البساتين
كل ما جاء رد حلو وصافي
حنا لحله يالفهيدي فهيمين
حلم وتفسيره مكمل وكافي
فالح غازي الحربي
الا يالله طلبتك بالنصر لأخواننا بالدين
يحل النصر في شام الكرامة وافيٍ شافي
نشوف الحلم وبه رؤيا تجي مثل الفلق وتبين
ورؤيا المؤمن الصادق سواة الصبح تنشافي
صلاح بن عبدالله اليابس
انا لغز الفهيدي حطني ما بين جيم وسين
وانا منه متحير قلت يا خلاق يكافي
صحيح يشوفه النايم ولا يشوفونه الواعين
هذا حلمن يمرك وأنت نايم مرك وطافي
سعد صنهات السهلي
هلا يا مرحبا باللي طرح لغز يسر العين
يجيك العد من معدن واصله طاهر صافي
قريت اللغز بالصفحه واحاول حله ببيتين
هذاك الحلم ياصاحب عساه مكمل وافي
علي رشيد الرشيد
تراه الحلم لغزك ما يشوفه مبصر العينين
وكفيف الشوف شاف الحلم في نومه وذا كافي
اللغز رايع يا الفهيدي بعد اسبوع الحل يبين
عبر صفحة خزامى يكتبون وكتبهم وافي
محمد ابودحيم
الا يا مرحبا باهل الوفاء والطيب واهل الدين
والا يا مرحبا بكل ابلج مطنوخ وسنافي
على صفحة خزامى بعد جانا اللغز في بيتين
أنا بقول هذا الحلم يوم الحلم خطافي
حسن غنام الشامري
سلام الله عليكم يا هواة اللعز يالوافين
واخص اللي بدع لنزه على وزن وعلى قافي
وحله يا الفهيدي كان انا اصبت الهدف ذازين
لغات ابرايل اللي خلت الاعمى كمن شافي
عزوز العلي
قريت اللغز في وقت الاجابة والعرب غافين
وكتبت الحل يا محمد ونوض البرق رفافي
واقول الحلم لا تفشيه مهما كان زين وشين
وسم الله وانفث عن يسارك والله الكافي
علي زولان الفيفي
خزامى كل جمعه تتحف الشعار والقارين
بأبيات(ن) ولغز(ن) مستجد بالحلى وافي
وطرات اللغز لا خطاب رجال(ن) فيه مهتمين
وحل اللغز حلم(ن) للعمى لانام ينشافي
سعود عائش الحربي
الا يا صاحبي لغزك شبيه السيف أبو حدين
هذاك الحلم يا صاحب مافيها شكك واخلافي
وكم واحد حلم حلمه وتفسيره بزين وشين
وخذ حلي وجعله يارفيق الطيب جاء وافي
راشد عبدالرحمن اليابسي المطيري
كما توصل للحل نثرا
عقلاء مثقال العبدلي
لغز الاسبوع
كتبه للصفحه الشاعر مطلق علي صفوق الشملاني ويقول
ويش خمس في سفينه تراهن راسيات
الغرق يملا الجزيره بطشه من بحر
الجزيره لو تنقل فهن به ثابتات
وهن وربي وزنهن قيد ياناس الظفر
نستقبل الحلول عبر الايميل rb-khozama@alriyadh.com او الفاكس 014871070 كما نرحب بطرح الألغاز الجيدة.