أنا وحظي

يا صاحبي لا هنتْ خلك على الخطّْ
حظي الى قاطعتني يوم عيده
لا هنت يا حظي بدال الحَبِي خطّْ
راح العمر ما باقي إلا زهيده
عليّ يا حظي بحافي القدم وطّْ
حالي معك يالحظ حاله فريده
إلى بغيت أجني الثمر من يدي بَطّْ
حظي ردِي ما كل شيءٍ يجيده
متى عقب هالعمر يالحظ تنشطْ
وأعيش مع غيري حياةٍ سعيده
أنا وبعض الناس نجلس على الشطْ
نقنص نبي ما مر بالماء نصيده
قنصت أنا الخاطوف وهو قنص بطْ
حظي عمى ما شاف كبر الطريده
أشربْ كِدرْ واللي معي للّبَن لطّْ
يضحك على عقلي يحسبنْ حفيده
ما قدرن يوم انجضعْ قال لي غط
متثاوبٍ يوم اطمئن لرصيده
وط الذي بيدك قبل ما نْهبه وط
وطه قبل ما تم قولي وأعيده
إلى نخيت الحظ قام يتمغطْ
أخاف إلى به جلطةٍ في وريده
حظٍ مثل حظي بلا شك منحطْ
إلى بغى ينهض يخونه عضيده
اللي إلى مني نويت اقعده غط
بالنوم ما ينفعك حاصل حصيده
ما شفت أنا مثله مع الحاضرة قط
ولا مع اللي بالديار البعيده
إلى بغيته عاندن برطمه مط
ما كني إلا واحدٍ من عبيده
إلى نويت امسك يده وانصحه نط
باسم الله الرحمن من هالمكيده
يقول إلى مني بغيت أعتمد وط
يثنين لو عييت ثني الحديده
يقبل عليّ الخير وإلى وصل شط
بغيت أتلّه مير نحانْ بيده
جملة مفيده حط من تحتها خط
متى يجي بالبال جملة مفيده
لا تقبلْ المشبوه والشيء الارقط
واللي عليه قشاش خلك وليده
خلك حذر بالحيل ياالذيب الأمعطْ
وابحث عن المعنى وبيت القصيده
اللي وأنا غافل نوى يجرحنْ حطْ
صيخ الحديد اللي تخطريت بيده
الطيب الأصلي كلّ ما تلمسه عط
وإلا الردي منبوذ محدٍ يريده
الطاء على اللي يقرض الشعر يشتطْ
ما ينقنص مثل القوافي العديده
الأصل للي كزّلي يا ولدي خط
والصورة الأولى لراع الجريده