يا من شرى له من حلاله عله!

الناس شغاله هاليومين سوالف عن حقوق العمالة وما العمالة وجالسين يهلون دموع اربع اربع على وضع الخادمات في البيوت السعودية وان هالخدامات يعاملونهن معاملة قشرا، صحيح ان هالكلام ما هو كذب مية بالمية بس ما هو صحيح مية بالمية، صحيح ان فيه بعض الاسر ما يقدر يعيش معهم بعير كبده من حجر بس ترى كثير من العوايل محتاجين حقوق الانسان تحميهم من عمايل الخدامات، خدامة تجيك ما تعرف تسوي شي، ما غير تقلب عيونها وكل من قال لها كلمة قامت تبكي وتشاهق ولا تفهم ولا ينفهم عليها، وكل ما قال لها احد يا بنت الحلال وش فيك؟ زادت على بوري الصراخ حقها، تدق على راعي المكتب اللي جابها قام ينافخ عليك، اكيد ان تعاملكم معاها اقشر، مهما تحلف له ما يصدق، عشان خابر انها بعد يومين تجيه هاربه ثم يقوم يأجرها بالشهر ألف وخمسمية ريال، ما خرّب اخلاق الخدامات غير حقين المكاتب اللي بعضهم شغال سوق سوداء، الخدامة من تجي عند الاسرة السعودية بعد اسبوع تعرف البير وغطاه عن السوق السوداء وان فيه خدامات يستلمن بالاجار الشهري رواتب عالية تطيب نفسها من البيت اللي هي جايه على كفالته، الحين قويت عين الخدامات وصارن يقاسمن ربة البيت في الحل والربط، بعضهم ترفض تطبخ لأنها جاية بس تغسل.