• اليوم حيتحدد مين هوه بطل كأس خادم الحرمين الشريفين لما يتقابل بطل الكؤوس النادي الراقي مع النادي العالمي وبما اني لاعب كورة قديم حقول انه خطوط الأهلي أفضل بكتير من النصر سواء في الدفاع أو الوسط أو الهجوم وأنا عارف انه بعض الحبايب من القراء حينبرشولي ويقولوا ترى دفاع الأهلي شربة خاصة قلبي الدفاع وعشان كده أنا حرد عليهم بعد ما اسحبهم يمين وشمال وكباري وأقولهم إذا لعب بالمينو كقلب دفاع اطمنوا حيكون الدفاع بخير أما خط الوسط حيكون في أحسن حالاتو بوجود تيسير وكماتشو ومعتز واللي لازم يخفف من وزنه أما خط الهجوم حيكون ناري بوجود فيكتور والحوسني بس أهم شي المدرب الأصلع جاروليم ما يتفزلك ويخبص ويلعب بمهاجم واحد ولازم يعرف انه دي المباراة مباراة كأس. أما بالنسبة لفريق النصر فالعالمي ما وصل للمباراة النهائية إلا وهوه يستاهلها بعد ما هزم الشباب رايح جاي وفاز على الفتح في الرايح وانغلب في الجي وبكده تأهل للمباراة النهائية، أما بالنسبة لخطوط الفريق النصراوي فالعالمي عنده مجموعة من اللاعيبن المميزين في كل الخطوط وخاصة الخبير حسين عبدالغني والمشاكس الحاج بوقاش اللي يخوف بتصويباته المفاجئة لكن اللي ينخاف منه على فريق النصر قلب دفاعو بوجود البرناوي وعيد ويمكن يكون هدا الخط هوه أضعف الخطوط في الفريق النصراوي على العموم نتمنى نشوف مباراة جميلة من الفريقين والفايز حنقولوا مبرووك والمغلوب حنقولوا هارد لك. • زمان كنت أحضر مباريات الدوري لما كانوا اللعيبة يلعبوا لشعار ناديهم وولاؤهم كان لناديهم مو الأيام دي اللي الكورة صارت فلوس في فلوس وياريتهم يستاهلوا. المهم زمان كنت أتفرج مباراة وأنا جالس في المدرج سمعت واحد من الجماهير بيقول لواحد من اللعيبة كان مشهور بشوتاتوا من خارج منطقة الطمنطعش (وول عليك رجل ما ذاقت الجبس) عشان كده بقول لكل الجماهير اللي بيتفرجوا المباريات سواء اللي في المدرجات أو اللي في بيوتهم لما تشوفوا لاعب من اللعيبة بيقدم مستويات كروية ممتازة وعندو فنيات رائعة قولوا دايما ماشاء الله وصلوا على النبي وبلاشي تصقعوا اللاعب عين وتجيبوا خبره لانكم زي منتو عارفين انه العين حق تفلق الحجر وتدخل الجمل القدر وكفاية اللي حصل لبعض اللعيبة اللي العين أبعدتهم عن الملاعب وحرمت الجماهير من إبداعاتهم وفنهم الكروي والدليل على كلامي اللاعب فيصل عتيق الله لاعب النادي الأهلي الله يرحمه واللاعب التاني المهاجم الفنان لاعب أبها والوحدة محمد حرشان الله يرفع عنه ويشفيه واللاعب مالك معاذ اللي انطفا نجمه وربنا يستر لا يكون اللاعب محسن العيسى في الطريق لانه بيعاني من إصابة غريبة عشان كده بنقول قولوا ماشاء الله وصلوا على النبي. • ما حعاتب سامي الجابر على خروجه عن النص بس أبغى أقلو إنت نجم مشهور حاول قد ما تقدر انك تمسك أعصابك مهما كانت ظروف المباريات وزي مابيقولوا لسانك حصانك إذا صنتو صانك. • كل الترشيحات بتقول انه الأهلي بطل الكأس لكن ويا خوفي من لكن. [email protected] للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
