الكورة حظوظ

بالبلدي الفصيح

- أبغى أقول كلام للأمير الخلوق فهد بن خالد الفريق الأهلاوي بيحارب على جبهتين كأس الأبطال وكأس آسيا وعشان يقدم الفريق مستويات متميزة في هادي البطولتين أتمنى من الأمير فهد ومن المدرب جاروليم انهم يشوفوا حل في المصيبة اللي اسمها خط الدفاع، خط الدفاع يا طويل العمر في هدا الموسم (شربة) ويخووف ويبغالوا لاعب متمكن يعرف كيف يتصرف، يعرف كيف يوجه خط الظهر اللي معاه وكفاية علينا الاقوان اللي دخلت فطيس في مرمى الحارسين وأغلبها بأخطاء قلب الدفاع والاظهرة .
- قلنا لكم يا جماعة الخير ترى الكورة حظوظ وإذا كانت البطولة مكتوبة لك حتاخدها والدليل على كلامي برشلونة الاسباني هدا الفريق بيقدم في الدوري الاسباني وفي بطولة اوروبا مستويات وفنيات كروية رائعة وجميلة يستحيل يقدمها فريق غيرو وللاسف راحت عليه بطولة الدوري الاسباني وراحت عليه بطولة اوروبا، في مباراته مع تشلسي لعب نص باب وتشلسي ناقص لاعب وهاجم من كل الجهات من الاطراف ومن العمق وضيع ميسي بلنتي غير الكورة اللي خبطت في القايم والشي اللي ينرفز في فريق برشلونة انه ما في شووت من بره الطمنطعش خاصة مع تكتل تشلسي الدفاعي وفي الاخير يركب فيه هدف في الوقت الضايع ويلعب تشلسي على نهائي اوروبا بعد ما انتهت المباراة بالتعادل. قلنا لكم الكورة حظوظ.
- شكلو كده والله أعلم انه اللاعب سعود حمود حيبهدل معاه لجنة الانضباط بعد كل مباراه يلعبها في مباراة الاتحاد كان عنده ضحيتين رضا تكر وابو سبعان وفي مباراة الشباب كان ضحيتو اللاعب فرناندو وربنا يستر مين حيكون الضحية اللي بعدها
يا سعود حمود حبة حبة على اللعيبة ترى الكورة اخلااااااق.
- قعدت اكركر ومت من الضحك بعد الانسداح والانبطاح اللي سواه نايف هزازي قدام عادل هرماش وكنت اتمنى من الحكم الدولي مرعي عواجي انه يرفع الكرت الاحمر في وجه نايف بعد الحركة البايخه اللي سواها واللي بتدل على سوء سلوكه، يعني لا خيرك ولا كفاية شرك. لكن الحق مو عليه الحق على بعض المحررين الرياضيين اللي ابتليت بيهم الصفحات الرياضية اللي اعطوه اكبر من حجمه، معليش يا حبايب لا تلوموه يبغى يقلد نطحة زيدان ضد المدافع الايطالي ماركو ماتيراتزي وصدقت الجماهير الاتحادية لما قالت انك لاعب فلاشات ومكانك الطبيعي دكة الاحتياط.
- إبراهيم هزازي رجع لسالف عهده نرفزة وكروت حمراء وزي ما بيقولوا قطع العاده عداوة.
abofatoo@hotmail.com
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة