مبروك لبلطان الشباب

بالبلدي الفصيح

* أبغى أقول كلمة لكل الكتاب الرياضيين ولكل رؤساء أقسام الصفحات الرياضية يا حبايب يا جماعة الخير روقوا المنقا واستهدوا بالله وصلوا على النبي وبلاشي من شعللة الوسط الرياضي بمقالات ومنشيتات التعصب والهمز واللمز اللي ما لها داعي محد حيخسر من كل هادي المقالات البغيضة والمتعصبة اللي نقرأها في صفحاتنا الرياضية إلا رياضتنا السعودية يا ريت نكون يد وحدة نبارك للفايز ونواسي المهزوم ونقول له خيرها في غيرها والكورة فوز وخسارة ويوم لك ويوم عليك وبلا شي من الكتابات اللي تنفخ القولون وتجيب الهم والغم والسكر والضغط والا انتو إيش رأيكم يا حبايب؟
* قامت الدنيا وقعدت على فوز الشباب ببطولة الدوري يا ناس يا هووه ليه الزعل وليه التعصب البطولة راحت للشباب لانه يستحقها لعب بالتكتيك اللي أعطاه البطولة وعرف مدرب الفريق كيف يجيبها بتكتيكوا التدريبي الممتاز بعكس مدرب الأهلي اللي دخل المباراة وهوه متخوف من هدف مبكر وهدا اللي حصل لانه لعب بطريقة دفاعية وبمهاجم واحد وكان المفروض يلعب بطريقة هجومية لأنه المباراة مباراة بطولة وما عنده إلا فرصة وحدة يعني لازم يفوز لكنه خبص ولعب بطريقة دفاعية في الشوط الأول وفي الشوط التاني صحصح وغير من تكتيكوا لكن بعد ما طارت الطيور بأرزاقها مبروك للشباب وهارد لك للوصيف.
* قامت الدنيا وقعدت على تصريح البلطان اللي قال فيه وبالفم المليان وشافوه كل من تابع الفضائيات العربية وغير العربية «فوز الشباب ببطولة الدوري هوه انتصار للقيم والعدالة والمبادي» يا جماعة الخير الراجل فرحان ومصهلل ببطولة الدوري وهدا الشي من حقه ومن أبسط حقوقه وفي نفس الوقت الراجل مغبون ومقهور من السنة اللي فاتت اتركوه يفضفض ويقول كل اللي في قلبه هوه يلاقيها من بعض الكتاب الرياضيين والا يلاقيها من الاتحاد السعودي والا يلاقيها من الفيفا اللي اعتبروا مهزوم بعد مشاركة السعران في مباراة الاهلي الشهيرة.
* تحزن ويجيك الاكتئاب والغثيان لما تسمع تصريح لاعب بيقول انا (عانيت من الاهلي عانيت).
مصيبة كبيرة لما اللاعب يترعرع في النادي اللي اتربى فيه من صغره ولعب فيه بكل الدرجات الين وصل للفريق الأول وكان هدا النادي هوه السبب في شهرته ولعبو للمنتخبات ويجي في الأخير يخبصها بتصريح ماله داعي، صدق الشاعر لما قال «ومن يصنع المعروف في غير أهله يكن حمده ذما عليه ويندم»، عشان كده أبغى أقول لأخينا الركادة زينة زي ما بيقولوا إخواننا الكويتيين.
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 136 مسافة ثم الرسالة