«دق هنا يترج هناك»

مع حلمنتيشي

مبروك لكل أهلاوي الفوز بكأس خادم الحرمين الشريفين هادي البطولة الغالية على كل أهلاوي، ومبروك لرمز الأهلي الأمير خالد بن عبدالله هادي البطوله اللي تعب وصرف عليها دم قلبه عشان يرجع الكأس لدولابه، بس ياحبايبنا يا أهلاوية عندي لكم نصيحه، وبما أني لاعب كورة قديم وأعرف اللاعب من مسكتوو للكورة أبغى أقولكم كلمة تخلوها في بالكم مزبوط ترى خط الدفاع عندكم (شربة) ولازم تشوفوا حل في هدا الخط لأنه من أهم الخطوط في لعب الكورة يعني لازم الإدارة الأهلاوية تشوف لاعب قلب دفاع مزبوط وتحاول أنها تتعاقد معاه وياكتر قلوب الدفاع اللي موجودين في الاندية المحلية أو العربية، بس بشرط يكون الاختيار مزبوط عشان من يوم مايبدأ الدوري يكون عندكم خط دفاع أقوى من كده،وخط الدفاع زي منتو عارفين هو أمان الفريق وهوه الخط اللي تبدأ من عنده الهجمة وبلاشي من التخبطات اللي بنشوفها من بعض لعيبة خط الدفاع اللي كانت حتودي الفريق في خرخر، وياريت كمان تصرفوا النظر عن كوماتشو لأنه هدا اللاعب خلاص مستهلك وعمره كبير وطريقة لعبه معروفه وما عنده شي جديد يقدمه للفريق ياريت تشوفوا صانع ألعاب معتبر من تونس والا من المغرب والا من الجزائر أو حتى من دول الخليج. لاعب يكون صغير في السن يقدر يخدم الفريق كم سنه على حسب العقد اللي حيكون بينكم وبينة، وهادي النصايح قلتلها لكم لأنه الفريق عنده مشاركات كتيره سواء في الدوري اللي حيبدأ بعد كم شهر أو في البطولة الآسيوية وانتو عاد «ادرى وابخص».
التوقيع
حلمنتيشي