حراج العصر

بالبلدي الفصيح

شوفوا يا جماعة الخير أنا اليوم حتكلم كلام وإن شاء الله يكون خفيف لطيف على مسؤولي الكرة في وطننا الغالي سواء كانوا في اتحاد الكرة أو رؤساء الأندية وإن شاء الله يكون كمان خفيف لطيف على اللاعبين اللي بيقولوا عليهم انهم محترفيين وهما لا محترفين ولا يحزنون وإن شاء الله ما انلام بعد الكلام اللي حقولوا، اتمنى من كل قلبي انه اتحاد الكرة أو المسؤولين في لجنة الاحتراف أنها تشوف حل لحكاية هادول المحترفين اللي حالهم زاد في المبالغ اللي بيطلبوها سواء عن طريق اللاعيبن نفسهم أو عن طريق وكيل أعمالهم اللي مسوي (فيها ابو عرام) ياتدفعوا للاعب والا نشوف نادي غيركم لانه بصراحة هدا اللي جالس بيصير مو احتراف هدا اسمه حراج عصر كل لاعب باقيلوا مع ناديه كم شهر يجي يتفزلك ويتعنطز ويتفلسف على ناديه يا تدفعوا اللي ابغاه يا في غيركم حيدفع اكتر (وعلى ايه يا حسرة) والمصيبة انه بعض رؤساء الاندية بيساعدوهم على هدا الموال وتحاول تتصيد في الامور اللي زي كده يعني بالبلدي يتصلوا على اللاعب ليل ونهار لا توقع لناديك نحنا حندفعلك اكتر وتوصل المساومات بين اللاعب وناديه لمبالغ كبيرة والدليل اللاعيبن اللي راحوا من فريق القادسية لفريقين في المنطقة الوسطى اندفعت فيهم ملايين الريالات وفي الاخير طلعوا (شربة) وغيرهم كتير من اللاعيبن اللي ورطوا معاهم الاندية واتعاقدت معاهم وبرضوا طلعوا شربة، عشان كده بقول لازم يكون في حد ومبلغ معين للاعب حتى اذا كان حينتقل لنادي تاني يكون مبلغ الانتقال معقول مو يجييني لاعب باقيلوا كم شهر مع ناديه ويطلب مبالغ خرافية توصل ل 30 مليون وهوه ما يستاهل في السنه كلها نص مليون ريال عشان كده بقول لازم يكون في حد معين للاعب المحترف يعني 5 مليون ريال في خمسة سنوات وكتير عليهم وبعدين أي احتراف اللي جالس اللاعب السعودي بيتكلم عنه طول الليل سهران ما في الا (صن ومعصوب) وطول النهار نايم وقبل المغرب راح للنادي واتمرن ساعتين ومسك الباب والدليل على كلامي خروج منتخبنا الاول من كأس العالم وخروج المنتخب الاولمبي من تصفيات بطولة لندن لانه الفلوس عمتهم وما عاد صار عندهم انتماء وولاء لبلدهم كل همهم كيف تجيهم العقود الاحترافية وكيف يكسبوا الملاييين .
abofatoo@hotmail.com
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة