قبل لا أدخل في كلامي احب اقول ألف مبروك عليكم المناصب الجديدة واسأل الله سبحانه وتعالى انه يعينكم ويساعدكم على حمل هادي الامانة وتسووا كل اللي تقدروا عليه وتقدموا خدمات جليلة لبلدكم وللمواطنين وعلى العموم أنا حتكلم معاكم بلسان المواطن الشعبي البسيط، وأقول لوزير التخطيط انت العقل اللي بيخطط عشان كده يا ريت تتعرفوا على احتياجات المناطق من مشاريع مختلفة سواء كانت خدمية أو إنتاجية تساعدهم على التنمية، ويا ريت كمان تسووا خطة استراتيجية تعكس رؤية الدولة لعملية التنمية لأكثر من 10 سنوات وتسووا كمان خطط خمسية وسنوية تبنى على التعداد السكاني للمملكة عشان نعرف قد ايش البلد محتاجة مشاريع مستقبلية لازم نعملها في كتير من المجالات زي التعليم والصحة والضمان الاجتماعي والطرق والوظائف سواء للبنات أو للشباب، ويا ريت كمان يكون فيه رصد وتقدير لاحتياجات المجتمع من المساكن اللازمة لاسكان المتزوجين حديثا من مختلف المناطق، ويا ريت كمان تستثمروا موارد المجتمع سواء كانت هادي الموارد مواد خام أو موارد مالية أو موارد بشرية، ويا ريت ترسموا خارطة طريق عشان نستفيد من الموارد البشرية للمجتمع في كل المجالات ونحقق التشغيل الكامل لهادي الموارد ونسوي اللي نقدر عليه عشان نخفف من حجم البطالة في المجتمع، هدا اللي نتمناه من وزير التخطيط وربنا يعينك ويساعدك، أما وزير التجارة فأقوله يا ريت تشوف لنا حل مع هادول التجار اللي ما يخافوا الله فينا هلكونا ودمرونا وبهدلونا كل يوم والتاني وهما رافعين الاسعار علينا والاسعار متفاوتة ما بين كل بقالة وبقالة سعر، وما بين كل سوبرماركت وسوبرماركت سعر، حتى الهيبرات الكبيرة أسعارهم مختلفة لا واللي يقهرك زيادة انهم يطبعوا بروشورات للمواد الغذائية والاستهلاكية ويرموها على بيبان الشقق وتعال شوف كيف الاسعار نازلة، طب ليه ما تكون هادي الاسعار ثابتة طول السنة، ليه اللف والدوران على الغلابا عشان كده بقولك لازم يكون في رقابة مشددة وتشهير على هادول التجار الجشعين اللي ما يخافوا الله في عباد الله وربنا يعينك ويساعدك، أما وزير الخدمة المدنية فكلامي معاه حيكون خفيف واقوله أتمنى من كل قلبي انكم تشوفوا حل لحكاية التوظيف اللي بيعاني منها كل المتخرجين والمتخرجات سواء كانت التخصصات أدبية أو علمية وعلى راسهم المتخرجين والمتخرجات من أقسام التقنية الحيوية والكيمياء الحيوية اللي بيتخرجوا وما بيلاقوا مسمى وظيفي يقبل تخصصاتهم رغم انه اللي بيتخرج من هادي التخصصات في بلاد بره بيسموه (عالم) عشان كده بقولك الله يعينك ويساعدك على دوشة التوظيف، أما وزير الحج فأحب أقوله يا ريت تشوف حل لحكاية حملات الحج الداخلية، لانه أصحاب هادي الحملات بيبالغوا في أسعارهم بشكل مخيف والمواطن الغلبان اللي يبغى يحج ما يقدر طالما هادي اسعارهم عشان كده لازم يكون فيه تسعيرة معتمدة لحجاج الداخل تكون خفيفه على المواطن الغلبان عشان يقدر يحج وربنا يعينك ويساعدك، أما حبيبنا محافظ مؤسسة النقد فاحب اقوله يا ريت يكون فيه نظام موحد للبنوك من ناحية القروض ومن ناحية تفاوت العمولات لانه اللي بنشوفه من البنوك شي مو معقول كل بنك بيشتغل على كيفه كأنها بقالات مو بنوك، لازم يكون في هيكلة وبرمجة متعارف عليها تمشي عليها البنوك عشان الغلابا اللي زينا ما تروح فطيس معاهم، وعشان كمان نعرف راسنا من رجولنا وربنا يعينك ويساعدك وعيشوا كتيييير تشوفوا كتيييير. [email protected] للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة.
