جدة وأمينها الجديد

بالبلدي الفصيح

قبل لا أدخل في هرجتي حق اليوم أحب أبارك لمعالي الدكتور هاني أبو راس المنصب الجديد واقوله مليون مبرووك وربنا يعينك ويساعدك على هادي المسؤولية الكبيرة اللي اتشرفت فيها عشان كده أتمنى من كل قلبي أنك تكون قد هادي المسؤولية اللي تشرفت فيها وتكون عند حسن ظن كل أهالي جدة اللي محزنهم ومضايقهم حال عروس البحر الأحمر واللي أوضاعها ما تسر لا عدو ولا حبييب وأحب أذكر معاليكم بأول تصريح قلتوه بعد ما تم تعيينكم أمينا لمحافظة جدة بتقول يا معالي الدكتور في أول تصريح لك.. «ينتظر جدة عمل شاق، ومسؤولية كبيرة كلفني بها ولي الأمر، وسأضع خطة عمل لمعالجة مشكلات جدة خصوصا أنها تعيش حاليا ورشة عمل مفتوحة لمشاريع متعددة، وإن أمام جدة ملفات مفتوحة عديدة، سواء فيما يتعلق بالصرف الصحي، والأحياء العفوية، والاختناقات المرورية، وشبكة الطرق الحالية والمستقبلية. وجدة تعيش مرحلة مفصلية في تاريخها الحديث؛ لا سيما عقب كارثة السيول، وسأعمل على خدمة هذه المحافظة الغالية وأهلها، وستكون أولى مهماتي الانتهاء من المشاريع القائمة، ورسم خارطة لأولويات الأمانة في المرحلة المقبلة، سواء فيما يخص المشاريع القائمة، أو المستقبلية، أو المشاريع المتعثرة». هدا تصريح معالي الدكتور وأتمنى انه يكون تصريحوا بلسم شافي لجدة وأهلها ويكفينا اللي جانا من وعود وتصاريح قالوها قبلوا من أمناء جدة وما أخدنا من هادي التصاريح والوعود إلا سراب وحبر على ورق لأنه بيني وبينك يا معالي الأمين مدينة جدة صارت عجوزة ويحتاج لها شغل كتييير.. جدة يا معالي الأمين محتاجة لسفلتة جميع الشوارع والميادين والأزقة من الحفر والمطبات اللي بهدلت الناس ودهملت سياراتهم وزي منت عارف ما في تعويض وكل مين يصلح سيارته.. جدة محتاجة لرصف وإنارة شوارعها.. جدة محتاجة لصيانة الحدائق العامة لأنه والله العظيم الحدائق العامة حالها مزري. جدة محتاجة للرقابة الشديدة على النظافة وعلى القمايم اللي مرمية في كل شارع وزقاق.. جدة محتاجة لمشاريع الصرف الصحي واللي بسبب وايتاتها اتبهدلت الشوارع واتكسرت.. جدة محتاجة إلى العدل والمساواة في بناء العماير يعني بالبلدي كده لازم تكون أدوار البناء متساوية مو واحد يبني سته أدوار عشان عنده واسطه وجاره اللي لاصق فيه يبني تلاته أدوار عشان ما عنده واسطه (العدل حلووو يا معالي الأمين).. جدة محتاجة لحملات تفتيشية على المطاعم لأنه بعض المطاعم ما يجي من وراها إلا الهم والغم والمرض.. جدة محتاجة لتنظيم ورش السيارات اللي منتشرة في الأحياء السكنية.. جدة محتاجة لنهاية مشاريعها اللي جمدت تطورها وازدهارها وبدل ما تكون عرووسة صارت عجوزة.. جدة محتاجة لمساحات ومسطحات خضراء واسعة وكبيرة في أحيائها وشوارعها وتكون فيها كل الخدمات من دورات مياه وألعاب وأكشاك للبيع عشان أهل البلد يقضوا أوقات حلوة وجمييلة فيها. جدة محتاجة أماكن لممارسة رياضة المشي بدل سور الحوامل اللي الغزلنجية ما تركوا بني أدمية إلا وعاكسوها.. جدة محتاجة همه وشغل كتيييير يا معالي الأمين عشان تكون مدينة فاتنة وجميلة عشان نقدر نقول عنها انها عروس البحر الأحمر بحق وحقيق واللهم إني صائم وعيشوا كتييييير تشوفوا كتيييييير
هرجة / أتمنى من كل قلبي أنه التصاريح والوعود تتحول لواقع ملموس يحس فيه سكان جده وأهلها.
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة