يا شركة المياه يا تغرقوهم يا تعطشوهم

بالبلدي الفصيح

قبل لا أبدأ في هرجتي حق اليوم.. أحب أشكر مسؤولي شركة المياه على كل الجهود اللي بيقوموا فيها، من ناحية صب الموية لأغلب أحياء جدة، رغم إنه لسه في أحياء كتييرة ما بتوصلها الموية بانتظام، وإن شاء الله الشركة تشوف لها حل في الحكاية دي، ونفتك من حكاية الوايتات اللي شغالة في البلد سردادي مردادي، واللي بسببها اتبهدلت واتكسرت شوارع وأحياء جدة.. لكن الموضوع والمصيبة اللي أبغى أتكلم عنها، وأبغى من مسؤولي شركة المياه أنهم يشوفوا لها حل جذري انه الموية في بعض الأحياء زي قويزه وأبرق الرغامة والسليمانية الشرقية وكيلو (6)، والله عالم يكون في أحياء تانية ما ندري عنها.. هادي الأحياء أهلها بيعانوا من حكاية الموية اللي بتصب كل يوم في خزاناتهم، والمصيبة مو هنا.. المصيبة انه من قوة دفع الموية بتوصل لخزانات العماير اللي في السطوح من غير ما يشتغل الماطور (يا ساتر مواطير كم حصان دي)، وأصحاب العماير والبيوت اتبهدلوا، وصارت حياتهم جحيم من كتر الموية اللي بتدخل بيوتهم، ومن كترها ركبوا مواطير شفط عشان يشفطوا الموية من بيوتهم ومن خزاناتهم، وحكاية شفط الموية دي صارت تخوف لأنه بسببها لا سمح الله يروحوا فيها ناس ويموتوا، لأنه من قوتها صارت تدخل البيوت اليين ما صدعت جدرانهم وخربت شوارع أحياءهم، حتى أنه بعض أصحاب العماير حفروا آبار في بيوتهم وركبوا مواطير شفط.. كله عشان لا تبهدلهم قوة دفع الموية اللي عكننت حياتهم ونفضت جيوبهم، وهما كل يوم بيشفطوا هادي المويات اللي زادت عن حدها، لأنهم من فتره طويلة ما كانوا يشتكوا من هادي المويات، وكانت حياتهم رااااايقة لانه صب الموية في بيوتهم كانت مجدولة، لكن شركة المياه ما عجبها الحال، وصارت كريمة معاهم، وتركت الموية تصب عندهم كل يوم صباح وليل اليين شبعت بيوتهم واستفرغت خزاناتهم من كتر الموية، وصارت التسربات في كل جدار من جدران بيوتهم.. عشان كده أتمنى من شركة المياه الوطنية أنها تشوف لها حل سريع وجذري من دي الحكاية اللي بهدلت سكان هادي الأحياء، وتشوف لها حل من حكاية صب الموية يوميا على دي الأحياء اللي قلناها، لأنه اللي يزيد عن حده ينقلب إلى ضده، وأقول لها إن كان عندها فائض كبيير في الموية يا ريت تصبوا في الأحياء اللي سكانها محتاجة للموية، وتريح سكان هادي الأحياء من هم وغلب أصحاب الوايتات، وأنها تحاول قد ما تقدر أنها تعيد جدولة صب الموية في هادي الأحياء، لأنه مو معقولة الموية تصب 24 ساعة في خزانات أصحاب العماير وما تبغاهم يضرروا من قوة دفع الموية اللي كبدتهم خساير كبيرة، والناس مو ناقصة مصاريف اللي فيها كافيها، غير كده تبذير الموية بالشكل ده حرام ولا يرضي الله ولا رسوله، والله سبحانه وتعالى بيقول في كتابة الكريم «إن المبذرين كانوا إخوان الشياطين»، عشان كده أتمنى من كل قلبي انه الشركة الوطنية تشوف لها حل في حكاية جدولة الموية لهادي الأحياء، وتعطي أهل الحي على قد كفايتهم من الموية.. عشان يرتاحوا ويريحوا وارحموا من في الأرض يرحمكم من في السماء.. وعيشوا كتييييير تشوفوا كتيييييييير.
هرجة: حسبي الله ونعم الوكيل.. سامحك الله وكفى!!!!
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة