أتباع الفتن

بالبلدي الفصيح

نحنا والحمد لله في هدا البلد اللي أكرمه الله بأطهر مسجدين المسجد النبوي والمسجد الحرام.. متعودين انه نكون كلنا كبيرنا وصغيرنا خدام لكل حجاج بيت الله اللي بيجوووا من كل مكان في الدنيا وما نفرق بين حجاج وحجاج كلهم عين في راس.
لكن كمان ما تعودنا ولا تربينا بالمرة على الفتن والقلاقل والفوضى والغوغاء وعمل المشاكل ولا اهتمينا بالنعرات ولا حتى في اختلاف المذاهب.
هادول الحجاج اللي بيخشعووا ويطوفوا ويركعوا ويسجدوا يستحيل نسمح لأي أحد من كان يكون انه يعكنن ويخرب عليهم عباداتهم وصلاتهم وأداء مناسكهم في كل خشوع وطمأنينة.
الحج من زمن سيدنا محمد صلى الله عليه وسلم كان دعوة لتوحيد المسلمين وعمره ما كان الحج عشان زرع الفتنة والفوضى والكلام الفاضي اللي جالسين بيقولوه بشكة من المتخلفين.
الحج عبادة عشان يتخلص البني آدم من معاصي وذنوب.. واللي بيجي للحج ما يجي للحج إلا وهوه يتمنى رحمة الله جل وعلا وغفرانه، وما بيجي عشان يسوي الفتن والمشاكل والأحقاد، الحاج جا عشان طالب رحمة الله ومغفرته عشان كده لازم دول يفهموا أن تسييس الحج اللي قال عليه قبل شهر تقريبا.. ما حيجي من وراه إلا زيادة الفرقة والتشتت وإثارة المشاكل.
لكن بلدي دايما وابدا بتكون حريصة انها تتجنب وتبعد انها تتدخل في هادي الفتن والقلاقل.. عشان تحافظ على أمن وسلامة حجاج بيت الله الحرام لأننا والحمد لله بلد مسالم ما نتدخل في شؤون الدول التانية لكن في نفس الوقت ما نسكت ولا نسمح لأي أحد من كان يكون أن يخرب أو يعكنن صفاء الأجواء الروحانية الطاهرة لضيوف الرحمن اللي بنعتبرهم أمانة في رقبتنا الييين يرجعووا إلى بلادهم سالمين غانمين بعد ما يكونوا انتهوا من حجهم وعبادتهم.
هنا في بلدنا أرض السلام والأمان مكان ما ترتفع أيادي الحجاج والمعتمرين تحت الكعبة المشرفة داعية خاشعة طالبة رحمة الله وغفرانه ما عندنا مكان للفتن ولا للمظاهرات لأنه بلدنا والحمد لله ما تفرق بين أسود ولا أبيض لأنه الله سبحانه وتعالى ورسوله الكريم علمونا كده وعيشوا كتييييير تشوفوا كتيييير.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة