درع الوطن

في ذمة الله يا مليكٍ فقدناه
صارت عيون الناس ذا اليوم تبكيه
يالله يالمعبود ياللي دعوناه
انت الكريم اللي على الدوم نرجيه
تغفر لعبدك ما مضى من خطاياه
راعي المكارم بالفعايل تجازيه
حنا بصفاته والجمايل ذكرناه
والله ذكره داخل القلب طاريه
وشلون ننسى ما مضى من سجاياه
وحنا نعيش بها على الدوم نطريه
رمز التواصل والتآلف عرفناه
رجل السياسة والتحاور مباديه
عاش بحياته تبذل الخير يمناه
والشاهد الله كم تسامى معانيه
الله يجعل جنة الخلد مثواه
تجبر قلوب الشعب يا خالقي فيه
الموت حق كل نفسٍ بتلقاه
لا شك نفسك جالها منه تنويه
عاش الملك سلمان يمشي على خطاه
يحكم بشرع الله على نهج واليه
مرحوم يا شيخٍ على الدين رباه
يرعى مصالح مملكتنا بأياديه
عبدالعزيز ال سعود الله يجزاه
شيخ ٍ بناها ما توانت خطاويه
شهمٍ على حفظ المواثيق وصاه
الله على تحكيم شرعه يقويه
اختار من بين المخاليق مجناه
حتى تجي في ملزماته حراويه
حكام دولتنا هل العز والجاه
درع الوطن والدين تحمي مبانيه
نبايعك بالملك والله والله
منا الولا يا سيدي عهد تبديه
حب الوطن في قلوبنا ما ذخرناه
تحب من حبه ونكوي معاديه
واللي جحد فضل الوطن ذاك عفناه
الحب للمحبوب تظهر مواريه
عاش الوطن والامن والخير عشناه
واجب علينا بغالي الروح نحميه
هذا الوطن وان كان ما حنا حميناه
ما نستحق العيش يا سيدي فيه
قد قالها نايف عسى الخلد ملفاه
حنا على دربه نحقق مراميه
وان كان شيخ بحكمة الله فقدناه
في ارقابنا بيعه ونتبع خطاويه
بيعة وفا ما تعتريها مراواه
للعاهل اللي صانع المجد راعيه
والختم صلوا عد وبل ٍ نثر ماه
على ربوع الدار سالت مجاريه
على النبي المختار ختمت معناه
من ما يجيش القلب هيضت خافيه