دكتور فكري

عليه البارحة زابن
أشكي من الليل من كثرة مساريّه
ثم قال همْل طبيبك وانشد مجرب
وأقول طبك سبب نسيان ماضيه
عطني من اللي عطاك الله وسمعني
قال استمع لي أجل بذخر لك أوصيّه
الزم صلاتك وسبح ربك وهلل
تلقى علاجًا يزين كل نفسيّه
عقب الذكر ذكّر بربك ولو آيه
يجزيك الإحسان ويكفر لك السيّه
من عقبها الناس لا تنسى تصافيهم
اسدل ستار الحقد لا رحم ابو حيّه
لا تحسد الناس دام الله موهبها
الحسد يذبح ضما في خايع ريّه
يا سالم اسمع عسى تصغى اذانيك
اسمع كلاما محد قد قال لك زيّه
اليا بغيت الطريق المنعسر دربه
خل السنافي على محزمك جنبيّه
احذر من اللاش لا حطيت في صفك
ابسط عزومه على المعلوق شبريّه
حرٍ ليا فك نومس صاحبه هده
وحرٍ ليا هد فشل وجه راعيّه
واليا بغيت الحلال ومنتصف دينك
سند على عمك اللي صار واليّه
ما غير عمك لك العمه على راسك
ما هو مخليك في رجوات عانيّه
لا هان خالك ترى خالك يجي عقبه
وما كل خالٍ ينومس ذكر طاريّه
الا ليا صار زاهي فاسمه وذكره
تلقى العرب دايمًا تلزق فأساميّه
وابعد من اللي ورا الاخبار عساسه
ما جابت الحق لو جابت حراويّه
واليا وصل مسمعك شيء (يقولونه)
لا تلتفت له وهو من غير راعيّه
وفي لازمك لاحدٍ يدري وش تسوي
الناس تمحق على الشراي مشريّه
حتى رسول الله المختار قد وصى
اقضوا عزايم حوايجكم بسريّه
والناس لازم معا الايام تبخصها
من يبخص الناس يا من لقصة الحيّه
تدري متى يغترك في ذا الزمن واحد
لا شاف تمشي على طيب وصفا نيه