لا توسخه وتروح منته بمسموح خله نظيف تروح غيرك يجى فيه

بيت وصدى

كان بيت الأسبوع الماضي للشاعر ريان محمد الخنيفر من الرياض حول المحافظة على نظافة المتنزهات البرية وتحقيق مقولة دع المكان افضل مما كان او مقولة دع المكان كما تحب ان تراه..، والبيت يقول :
لا تترك الاوساخ بالبر وتروح
نظّف مكانك وانتبه لا تخليه
وكان صدى البيت من الشعراء:
ترى النظافة تسعد النفس والروح
من واجب المسلم وهي من مباديه
في مملكتنا كم مشاريع وصروح
حدايق وبران حلوه مفاليه
اليا طفشنا من المدن يمها نروح
واللي ينظف موقعه عاش غاليه
محمد العيسى/ مكة المكرمة
حكم القذارة في السنن غير مسموح
والدين وصّى كل من كان يوحيه
الكبش جلده ناطلينه على الدوح
واللي مشى في الارض تنجس مواطيه
حتى ولو راحوا على عالي سفوح
نفس القذارة ذا الذي ما ندانيه
سعود بن عبدالعزيز الهزاع - نعام
واللي على هالفعل ما هوب مسموح
ذي عادة يا شينها كيف راضيه
هذي نصيحة تعجب الكل بوضوح
وما قال ريان بينات معانيه
أبي جواب يعجب الكل مطروح
نوقف هل العادات مما نعانيه
محمد عبدالعزيز الخنيفر/أشيقر
الى عصيت الأمر فلا انت مسموح
.. واللي غلط شخص تحذر تجاريه
مالك من الإهمال فايد ومصلوح
الأحسن انك واجب الحق تعطيه
واللي يكابر مالنا معه مصفوح
يندم على فعله وتظهر خوافيه
علي رشيد الرشيد-رياض الخبراء
الى وصلت البر والبال مشروح
وقضيت وقت فيه روحه وجيه
الجو خالي واسع شرح مبروح
فيه العشوب المربعات المليه
كف الاذى بالك تخليه مطروح
حافظ عليه وخل غيرك يهنيه
حمد عبدالله الوايلي/حوطة سدير
الدين وصانا ولا أنتَ بمسموح
تترك محلك والقمام متعليّه
"" البر ماهولك وللناس مفتوح
كلٍ يبي المكشات والبر يغليّه
"" علّم عيالك وانت ناصح ومنصوح
واحرص على علمه قبل ماتسليّه"
عثمان ابراهيم الرشيد / الرياض
البر ياللي تبغي البر مفتوح
أمن وأمان واجبن تعتنى فيه
لا توسخه وتروح منته بمسموح
خله نظيف تروح غيرك يجى فيه
عان ام سالم صوتها صار مبحوح
بوقت العصير اتروجعه وأنت توحيه
سعد صنهات السهلي /الدرعية
البر رحله جلسته تطرب الروح
نسمة هواه لضايق الصدر تبريه
كانك ذهبت لفيضتن او بطن سوح
ترى غماق العشب ماينزل فيه
هي شعبة الايمان تبين بوضوح
عند اللذي قام بنظافة مفاليه
شلاش بن بلال العنزي - الرياض
على النظافة عود الجيل والروح
وارقى بدارك والنذل لا تخاويه
موطنك خله بين الاوطان مملوح
واحذر من اللي يزرعون الفتن فيه
خلك نزيه النفس عن كل مفضوح
والبر خله مثل ودك تلاقيه
علي الزولاني الفيفي /بيشة
بيت الأسبوع
اقترحنا أن يكون موضوع البيت اختياريا للشعراء بطرح البيت وموضوعه وبيت هذا الأسبوع للشاعر سعد صنهات السهلي من الدرعية بتنويه طريف عن وقت بياع الخبل عباته ويقول:
اليوم حر وقالوا البرد قد راح
البرد باقى يا مبيع عباته
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
ونرحب بطرح بيت الأسبوع
وموضوعه مفتوح للشعراء.