الاسبوع الماضي كان بيت الاسبوع للشاعر مبارك محمد الضعاوين من وادي الدواسر حول مقترح البيت والذي يتكلم عن المتهورين من الشباب والذين يتحدون قدرة الله باللعب في مجاري السيول والاودية بسياراتهم هذه الايام والذي يقول: حذراك لاتلعب مع سيول وامطار ترى النتيجة راح عمرك خسارة وقد كان صدى الشعراء: شي يهول والسبب ما به أفكار لا جاء نهار السيل يبدا مساره ياما سمعنا من كثيرات الاخطار لاجل التفاخر قلت ما هي شطارة وشفنا الدفاع اللي على الطيب واخيار ونخوة شباب اليوم عز وجدارة محمد عبد العزيز الخنيفر - أشيقر احذر ترى الوديان مكمن للأخطار عمر العبث بالسيل ماهو شطاره السيل مايرحم صغيرين وكبار يشيل مايعرض عليه بمساره ياكم هل الإنقاض تحذر بالأخبار والحر يالنشمي كفته الأشاره عبدالكريم بن خزيّم - البكيرية لاتحسبن الجيب ينجي من اخطار متوجهن لسيل يابو الشطاره ماتدري ان السيل مرسله جبار مامور والمامور ماهو بخياره لكن تفكر كيف يهطلن الامطار سبح بحمده والتزم في قراره فلاح مطر الحربي القريات عندى نصيحة قلت لكبار وصغار الهرج يكفي صامله بختصاره يا للى تفر الحي في كل دوار لا تفتخر تراك سواق طاره خلك ابيتك بس وأسمع للاخبار والحر قالو يكتفى بالأشاره سعد صنهات السهلي - الدرعية لا تقترب يالقرم حالات الاخطار ابعد عن المشبوه سوقه وداره لا تغامر بعمرك بوديان واحجار خلك لبيب في دروب الحذاره اعرف طريقك لا تقبلت مشوار ترى المخاطر تجتمع بالوعاره علي رشيد الرشيد بعض الشباب اليوم غامر بالاخطار يمشي مع الوديان فكره شطاره لاتقرب الشعبان في وقت الامطار كم واحد بالسيل راحت عماره ترا الحذر مطلوب من عقب الانذار الجو معروف ويعطيك اشاره عبد المحسن بن محمد المحيسن خل التهور لاتدور للأخطار كم نفس راحت والسبايب شطاره لاجى المطر خلك حريص وبحذار والوادي الجاري بعيد مساره لاتقربه لاصار في واديه جار هذا كلامي وافهمه بالاشاره حمد عبدالله الوايلي- حوطة سدير جعلك يبو طرجم تحرم على النار صغت النصيحة في بليغ العباره بعض البشر دايم يبي لفت الأنظار من زود جهله يعتبرها شطاره يقعد بوسط السيل في وقت الأمطار مع موتره راحت حياته خسارة يصير من ضمن الضحايا في الأخبار عزي لعيون ساهرة في انتظاره ناصر بن جمعان آل عوض - وادي الدواسر علام نلقي بالنفس وسط الاخطار في وسط سيل ما يخلي زباره يا صاح لا يخدعك تصفيق الانظار حتى البهايم ماتجي في مساره كل يحذر وانت كنك بمسيار تسرح وتسرح عن يمين ويساره علي آل زولان الفيفي - بيشة نصيحة كل يوم تجي بالانذار تنذر الجميع والحر يعرف الاشارة كل يتابع نشرة الطقس باخبار من أجل يتجنب كل سيل وخطاره يا اللي تجنب للسنع ما لك انصار وش فايدة لعبك بظهرالغماره مدعث عيد الفهري العبيدي - الرين ولا توهق لوك سواق بيطار ولا الدبل موجود عندك زراره تدوس ويدور الكفر كنه مادار والسيل غير موترك عن مساره تجمهرو عندك وقد صار ما صار احدن يدور ايمين واحدن يساره واحدن يكلم موتر صحيبنا طار وين الدفاع وكلنا في انتظاره غنام مسعود القريني - نعام الايام هذي كلها خير وامطار حذرا تهور تدعي بالشطاره وتقول انا شاطر معي جيب فكس آر ابقطعه واسبح وعندي مهاره تراه ما يعرف شظير وغدار مثل البحر وأخطر ولا فيه شاره مبارك بن محمد بن طرجم - وادي الدواسر حذير ترى السيل به خير وأخطار خطر تروح يا ولد با الخساره هذي وسيلة نقل ونقول ستار اللعب وسط السيل ما هي شطاره والدك قال السيل يابوي غدار فرقا الولد لابوه راس انكساره عبدالله حسين الدويس - نعام صحيح ما بيديننا منع الاقدار لكن عطانا الله عين وبصاره مجار الوديان في وقت الامطار كم خانت السابح أو راع الشطاره السيل ياما به من اخطار واضرار وكم نفوس او مال راحن خساره سعود عايش الحربي - القاهرة اوقف بعيد لا تجي حبس ينهار توري زملاك انك تعوم بغزارة تبي تسوي شاطر وراح شطار في موتره غرقان وسط الغماره مالله امر بالتهلكة يبن الاخيار السيل دربى من طريقه حجارة سعود عبدالعزيز الهزاع - نعام وعلى وزن وقافيه اخرى حول المعنى: احذرتجي في طريق السيل وتصير مدفون بالوادي لا تجأبه الله قوي الحيل وتروح ماعنك نشادي اخص راع الخطاء بالقيل والله هو الوالي الهادي محمد الربيلي بيت الاسبوع حول مقترح الأخ فهد بن سالم السالم من الرياض والذي يناقش ظاهرة قراءة الرسائل وكتابتها بالجوال اثناء القيادة وخطرها البالغ على السائقين ارسل للصفحة الشاعر ريان محمد الخنيفر من الرياض هذا البيت: رسايل الجوال تبغى سعة بال ماتنقري ياناس وقت القياده نستقبل صدى هذا البيت بثلاثة أبيات فقط تدو حول هذا الموضوع التوعوي ويفضل الإرسال عبر الإيميل [email protected] او على الفاكس (4871070/ 01) مقترح لموضوع بيت الأسبوع المقبل ارسل للصفحة الأخ فراج الفراج من الرياض مقترحا لموضوع بيت الاسبوع القادم وهو ضرورة الانتباه للسلع الكهربائية المقلدة وخطورتها ووجوب التوعية باضرارها والامل في منعها .
