بيت وصدى

كان بيت الأسبوع الماضي للشاعرغنام مسعود القريني والذي يقول:
لاتدفعك صوب الخطر فرحة السيل
واخذ العبر وافهم بمعنى السلامه
ومع شكرنا الجزيل للشعراء المشاركين ولكثرتهم فقد جزّأنا النشر على جزأين وكان صدى البيت من الشعراء:
مافيه داعي يااخي للتهاويل
ترمي بنفسك بين موت وندامه
ان كنت عاقل لاتطيع المهابيل
وان كنت جاهل نعتبرها غشامه
مايفيدك الانقاذ والحط والشيل
لو تتصل فيهم ليوم القيامه
محمد مبارك - المضة
فكر بامورك واتبع الفكر تحليل
حتى تفوز ولا تجيك الملامه
السيل مايرحم وشفنا تهاويل
واللي يفكر يكتشف له علامه
خلك حذر ياصاحبي صبح والليل
واللي يغامر تعتريه الندامه
علي رشيد الرشيد – رياض الخبراء
السيل ماهو لعب يامعاند السيل
احمد ولي العرش منشي غمامه
وابعد بعيد هناك لايلحقك ويل
مالك ومال المهلكات وهوامه
تتبع ارشادات من يكره الميل
واحذر تطيع اهل القشر والملامه
احمد بن ناصر المحرج - الرياض
يا طالعن للبر شيل المعاميل
برن ترا مهوب بر الثمامه
احرص على خوت رجالن مشاكيل
الكل منهم محترم في كلامه
لا من ضواك الليل احذر من الليل
ليلن على ماقيل يوحش ظلامه
سعد صنهات السهلي- الدرعية
هذي نصيحة للرجال الحلاحيل
اللي لهم منّا جزيل الكرامة
لا تدخلون السيل تلقى الغرابيل
واجب على الإنسان جلّ اهتمامه
واستغفر الله مع كثير التهاليل
حافظ على نفسك قبل الملامة
محمد بن عبد العزيز الخنيفر- أشيقر
السيل لي جا بقوّته يسبق الخيل
كم واحدٍ من الدرب قشّع خيامه
خصٍ بطون الاودية والدراكيل
وابعد بعيدٍ عن مسير الغمامة
و لي صب سيل الصنع في آخر الليل
حذراك يا غنّام توقف أمامه
سعود بن عبدالعزيز الهزاع - نعام
بيت الأسبوع
اقترحنا أن يكون موضوع البيت اختياريا للشعراء بطرح البيت وموضوعه وبيت هذا الأسبوع للشاعر احمد بن ناصر المحرج من الرياض ويقول:
دور على المحتاج بين الضعيفين
اللي مع الحاجه صراعات وحروب
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
ونرحب بطرح بيت الأسبوع وموضوعه مفتوح للشعراء.