بيت وصدى

كان بيت الاسبوع الماضي للشاعر خليف العجيلي من الرياض حول موضوع غلاء اسعار الاضاحي والذي يقول
سعر الاضاحي هالسنة باهض حيل
مع الغلاء ياناس جاها بلاها
وقد تجاوب العديد من الشعراء حول هذا الموضوع :
سلام يانسل النشامى الحلاحيل
الشاعر اللي به ربوعه تباهى
نبي نتشارك في قعودن او عجيل
ماحدنا الله للشياه وغلاها
واللي موافق يرسل الف بتعجيل
والمهله بتال الشهر منتهاها
عبدالعزيز الصالح - حائل
زاد الغلا بلحيل وطفح بنا الكيل
على الفقيّر مستحيل شراها
نشكى على رب عليه التساهيل
دنيا العنا الّى قام يكثر غثاها
انه يعم الخير من كثرة السيل
رزق الملا من ربنا فى سماها
ابراهيم العبد الكريم -الرياض
سعرالاضاحي قلت يحتاج تعديل
ونبي سبب مقنع بسبت غلاها
نبي خبر موجز وبعده تفاصيل
من اللي يبيعها نقول وشراها.
سعد صنهات السهلي- الدرعية
هذا وأنا قاعد مع طلة سهيل
وفكري مع أسعار الأضاحي وغلاها
وأقول لنفسي يا حُلو رقدة الليل
نامي وبكره بيتبيّن نباها
أما انقصت والاّ ارتفع سعرها حيل
والاّ المخابي أحسن الله عزاها
عاتق العاتق
خاف الله ياتاجر وللسعر تعديل
قبل تصيبك دعوة من سماها
وليد المنيف- أستراليا
الشكوى لله والغلاء عم كالسيل
ماوقّفت على الضحايا تراها
وهي مرتن بالعام ياشاعر الجيل
واعلى الضحايا افضل على قول طه
وبعض اللي صاحوا من غلا الضان بالويل
بسعره شرى لطفله لعب ورماها
عبدالعزيز البنيان
أيام حج وعيد وخير وتهليل
وأهل الضحايا ماضية في غلاها
لا تغرك الدنيا بزود المحاصيل
كل نفس فيها الخير تلقى جزاها
تلقى الضعيّف يفتقد للمداخيل
ارحم نفوسٍ ما تحصّل غذاها
محمد بن عبدالعزيز الخنيفر-أشيقر
سبعه تكفي يا قليل المحاصيل
ناقة كبيرة لوه عود ضناها
بألف وسبع ومادون ذلك مهازيل
عورا وعرجا وما تماشي اخوياها
كلش غلي مع الغنم يارجاجيل
حتى الدجاجه غالي مشتراها
شكواي للي يخضر الأرض بالسيل
يسقي مفالي الضان ويكثر نماها
سعود عبدالعزيز الهزاع- نعام
الي يطب السوق يشهد على الويل
والناس تشكي للولي من غلاها
وفي كل عام ترتفع اسهمه كيل
والكل يشرب مرها مع حلاها
وياالله تعدل كل مايل عن الميل
وترحم عبادك يوم قصرمداها
حمد عبدالله الوايلي -حوطة سدير
ماضر زوده غير ذباحة الحِيل
والإ الضحيه ماخِسِر مِن شراها
والليِّ طمِعْ خلوه في تالي الليل
وإلاّ بثالث عيْد يتعب ْ وراها
يبلش مع العمَّال بالحطْ والشيل
وامْناوبة حِراس وأكله وماها
فهد بن عقيل الطويان - بريدة
الله يجيب الخير وينزل السيل
حتى نشوف الارض باحسن بهاها
كثر الجشع ياناس من دون تنكيل
هذي امور مادري وش وراها
واظن مايحصل عروض وتهاويل
كل تأذى من تزايد غلاها
علي الرشيد - رياض الخبراء
بيت الاسبوع
للشاعر- فهد عبد الرزاق الرمال من الاحساء حول موضوع ضرورة معاملة العمالة المنزلية معاملة طيبة وعدم هضمهم لحقوقهم ويقول
الخدم صارت جرايمهم كثيره
ياترى وشهو سببها ياغناتي
نستقبل صدى هذا البيت بثلاثة أبيات فقط تناقش الضرورة البالغة لمعاملة الخدم معاملة حسنة وعدم سلبهم حقوقهم حسب مايمليه علينا ديننا الحنيف واتقاء لشرورهم
الارسال على الفاكس (014871070).
ويفضل الارسال على الايميل rb-khozama@alriyadh.com