بيت وصدى

كان بيت الأسبوع الماضي للشاعر غنام مسعود القريني والذي يقول:
لاتدفعك صوب الخطر فرحة السيل
واخذ العبر وافهم بمعنى السلامه
وكان صدى البيت من الشعراء:
في كل عام نسمع القال والقيل
وكم ناس مفجوعه وفيها ندامه
بعد الفرح عم الحزن والالم حيل
احد جرفه السيل مامن سلامه
واحد على دركال مليان به غيل
اقفى وخلا اسرته في ظلامه
حمد عبدالله الوايلي/حوطة سدير
هذي نصيحه واضحه كنها اسهيل
لك من لديه قدَّها أكبر علامه
الحذر واجب لا تجي سكة الميل
ونْص الدروب الجيده بالسلامه
الغيث من رب السما ما يجي كيل
لا تعبر الوديان تلقى الندامه
محمد العيسى/ مكة المكرمة
هذي نصيحة شاعرٍ تنفع الجيل
وحنا (على ما قال) نثبت كلامه
حذراك من غدر السّيول المضاليل
لا تلقي بنفسك هلاك وعدامه
جنّب دروب الشّر وافهم بما قيل
ترى الخساره عاقبتها ندامه
بندر إبراهيم الخنيفر
بعض البشر مايفهم العلم بالحيل
وبخاطره ان التهور زعامه
بالي روحه بقطعة الشِعب والسيل
ينشب ويندم و ماتفيد الندامه
والله لاتبطي ياعزتي لآخر الليل
إلا بكرم ربي و فزعة شهامه
سعد جعفر القحطاني - الدرعية
عقلك زمامك لايجي منعطف ميل
تصبح مثل حتى تقوم القيامه
لاتبلش رجال الدفاع المشاكيل
خلك بعيد عن سواحل تهامه
ابقى بدارك عن دروب المهابيل
واحمد ولي العرش منشي غمامه
علي الزولاني الفيفي/بيشه
إحذر وحذّر لا تجيك الغرابيل
الله عطى للسيل درب وعلامة""
لا تقربه لوك قويٍ وبالحيل
لا جيت دربه لاحقتك الملامة""
يشيل من جاله بدربه ترى شيل
ما ينفعك ياصاح كثر الندامة "
عثمان الرشيد/ الرياض
مافيه داعي يااخي للتهاويل
ترمي بنفسك بين موت وندامه
ان كنت عاقل لاتطيع المهابيل
وان كنت جاهل نعتبرها غشامه
مايفيدك الانقاذ والحط والشيل
لو تتصل فيهم ليوم القيامه
محمد مبارك /المضة
فكر بامورك واتبع الفكر تحليل
حتى تفوز ولا تجيك الملامه
السيل مايرحم وشفنا تهاويل
واللي يفكر يكتشف له علامه
خلك حذر ياصاحبي صبح والليل
واللي يغامر تعتريه الندامه
علي رشيد الرشيد – رياض الخبراء
يا طالعن للبر شيل المعاميل
برن ترا مهوب بر الثمامه
احرص على خوت رجالن مشاكيل
الكل منهم محترم في كلامه
لا من ضواك الليل احذر من الليل
ليلن على ماقيل يوحش ظلامه
سعد صنهات السهلي/ الدرعيه
هذي نصيحة للرجال الحلاحيل
اللي لهم منّا جزيل الكرامة
لا تدخلون السيل تلقى الغرابيل
واجب على الإنسان جلّ اهتمامه
واستغفر الله مع كثير التهاليل
حافظ على نفسك قبل الملامة
محمد بن عبد العزيز الخنيفر- أشيقر
السيل لي جا بقوّته يسبق الخيل
كم واحدٍ من الدرب قشّع خيامه
خصٍ بطون الاودية والدراكيل
وابعد بعيدٍ عن مسير الغمامة
و لي صب سيل الصنع في آخر الليل
حذراك يا غنّام توقف أمامه
سعود بن عبدالعزيز الهزاع - نعام