عواكيس

* عزيزي معوكس من تتوقع أن يتوج بلقب بطل دوري عبداللطيف جميل هذا الموسم بشرط تكون اجابتك صريحة كما عهدتك ابوالعواكيس؟
فهيد بن سالم - الرياض
- الدعوى كلها يانار شبي مولعة معسكرات وتعاقدات وتحكيم يلغي الاهداف الصحيحة!
* الغالي ابو العواكيس مجددا كل عام وانت بخير مشتاقين لطلتك وفرحانين لرجعتك بعد اجازة طويلة تكفى لاعاد تسويها شكلك لاعبها اوروبية وكاشخ بنظارتك الماركة
أحمد السليمان - عنيزة
- ابدا لا اوروبية ولا آسيوية الميزانية خلت صيفنا مع أهلنا أحلى في الصحن الدوار!
* قاهرهم وحابس دمهم ابوالعوكيس بصراحة وش تقول للي ما لقوا شيء ينتقدون فيه المدرب الوطني سامي الجابر الا لبسه أنا وغيري نشوفه عادي لكن المتعصبين ما فيهم حيل؟
أحمد الحمد - بريدة
- أقول عساكم على القوة أن بغيتوا ألبسوا خياش كاروهات وحققوا لو ربع انجازاته!
* الناقد الساخر الكبير معوكس تحية محبة من الاعماق وبعد: ياخي ذبحنا عشقنا "الليث" وآخرتها رباعية موجعة من شباب (العميد) نبي حل والله يستر ما تطير الآسيوية؟
الشبابي - عبودي
- أن طارت طار معها برودوم وجاكم الحل ماشين يعيقه!
* الأشهر والأملح ابوالعوكيس ودي أسألك وش فايدة معسكر الحكام في تركيا وهذا مستواهم من أولها كوارث تحكيمية والغاء اهداف صحيحه أجل وش رايحين يسوون؟!
بندر العصاد - عنيزه
- يصورون مسلسل سنوات الضياع مع يحيا ومهند!
* صاحب المليون رسالة ابوالعواكيس ياخوي بعض الجماهير والاعلاميين صحيح مهبل وشلون يشككون باحصائيات اعداد الجماهير.. أعتقد عندهم عقدة من شعبية المنافسين واعداد جماهيرهم وبطولاتهم وهم أزعجونا شغالين حتى في التدريبات كنهم لجنة التعداد؟
نبيل علي - العريجاء
- يارجال الحكي اللي يطلع منصة الذهب ويرفع الكأس اما ذا الخرابيط ما غير مهايط مايوكل عيش وتميس!
* عزيزي معوكس ما تشوف أن أحد المحسوبين على الاعلام مضغوط من سامي يوم انه ما كمل اسمه على باله يبي يأثر على نجاحاته؟
عبدالعزيز السعد - الشفاء
- اكيد مضغوط ودجاج على الفحم!
* الاستاذ معوكس ما هو الفارق بين انتقال المهاجم نايف هزازي الى الشباب ومختار فلاته الى الاتحاد
عاشق العميد - سلطان الصالح
- واحد فيه اللي كافيه ويضرب الحب شو بيذل!
* الغالي معوكس لمن تهدي مقطع يا زمان العجايب وش بقي ما ظهر؟
سطام العتيبي - الرياض
- للي يقول ما لقينا رعاة للدوري!
* الفنان معوكس تقبل مودتنا وحبنا لك وبودنا أن تعلق على بداية مستوى التحكيم في الدوري وكيف سيظهر في اللقاءات المقبلة؟
متعب الشمالي
- سيظهر حسب توجه العجراء!
* أستاذي الفاضل معوكس تحية وبعد: هل تتوقع سقوط مبكر لبعض مدربي فرق دوري جميل؟
نواف العبدالله - الخبر
- ابدا كلها كم مبارة والوعد صالة المغادره مع العفش الزايد!
* الناقد المبدع معوكس هل يمكن وصف مواجهة الاهلي والنصر في الشرائع بالكلاسيكو؟
نواف الصيخان - حي الفلاح
- كلاسيكو لفرق اللي كل سنة وهي على النهائي!
* عزيزي معوكس عودتنا على صراحتك المعهودة برأيك النقل التلفزيوني تغير فيه شيء.. يعني ارتحنا من بعض المخرجين اللي يركزون على جماهير فرقهم ويتجاهلون الفرق المنافسة؟
عليان هاشم-مكة المكرمة
- ما تغير شي بعض البرامج أزعاج مشجعين كنهم وسط الرابطة في المدرج!
* أستاذ النقد الساخر ابو العوكيس تتوقع الرائد والتعاون ينافسون على اللقب خاصة أنهم بثياب جديدة ها الموسم؟
وليد ابراهيم - بريدة
- الثياب الجديده شكلها علشان العيد!
مع تحيات معوكس وسلامتكم
للتواصل مع معوكس
بريد الكتروني
SPORT@ALRIYADH.COM
فاكس 4871070