بيت وصدى

الأسبوع الماضي كان بيت الأسبوع من طرح الشاعر محمد عبدالعزيز الخنيفر حول موضوع تعليق مثبت السرعة ويقول البيت:
مثبت السرعة زرع خوف بالناس
ودواسة البنزين صارت مصيبه
وكما تعودنا من الأصداء الجيدة كانت هذه الأصداء الجميلة تجاه هذه الظاهرة..
دامه خطر يجلب هواجيس وانعاس
انصحك ياللي تسمعن وش تبيبه
واللي بجواله يسولف معه كاس
سايق ويشرب قهوته مع صحيبه
خاطر بنفس ومال معدوم الاحساس
يالمتبع للعرق لا تقتديبه
فهد بن عقيل الطويان - بريدة
وشبابنا يسرع بلا حد وقياس
يزيد بالسرعه بفكره عجيبه
ما عندنا فن القياده بالاحساس
كله تخبط يا جماعه غريبه
حط المثبت كن ما حوله أوناس
ليه العجز ما بالعجز كود خيبه
طلال غارم آل فرحان - الرياض
وش حدكم يا أهل المواتر على الباس
ما هوب لازم كل سايق يجيبه
قتل النفوس الأبرياء إنس واجناس
من الكباير والأمور الغريبه
علي جابر آل زولان الفيفي - بيشة
امثبت السرعه امزود باحساس
لا تشغله يا صاحبي وش تبيبه
يا ناس انا بقول يا ناس ياناس
قصده يوضح للعرب تواجيبه
اللي يمثل عل بالفعل ينحاس
واللي صدق يلقى حلول المصيبه
سعد بن صنهات السهلي - الدرعية
يالفاهمين الوضع متعب وحساس
من بينكم ضعنا بشك وريبه
انتابنا خوف وشكه ووسواس
واهل الوكاله ماخذين الضريبه
كان الخلل منهم تحرو للافلاس
وان كانها من عندنا هي غريبه
باتل سالم ال روق - الرياض
اسبابه المصنع مخبط ومنحاس
وصار عند الناس شك وريبه
والحل يشمل له شمل وصف وقياس
يحتاج تركيز وزايد رقيبه
المشكله لا دندنت كل الاجراس
وقايد الموتر تزايد نحيبه
علي رشيد الرشيد - رياض الخبراء
يا مزود السرعة ظهر صوت الاجراس
بعض المواتر تنطللق وتغدي به
يا اخوان هذا شي ما يدخل الراس
منهو يرد العلم ولا يجيبه
ترى التمادي بالخطا شين وفلاس
كم راحت أرواح ولا أحدٍ دريبه
عبدالعزيز العنزي
كم واحد ماشي على الدرب واحتاس
علق عليه وحال حاله عصيبه
ياهل الوكالة هاتوا العلم بقياس
اخطائكم ندفع ثمنها ضريبه
وارواحنا معدومة لا بدا الياس
والموتر الي راح فدوة عطيبه
حمد عبدالله الوايلي - حوطة سدير
الحبيب طار وعلقت معه الاجراس
علق على الكي ام عله تصيبه
ثماني سرندل وراسين مو راس
وامن الطرق يبطي عظم ما يجيبه
من سبته ضاقت براعيه الانفاس
شباب لكن اصبح الراس شيبه
منيف الراشد - حائل
الموتر اللي لا عطا الخط حساس
يعلق ويضرب خطوطن غريبه
لو جاء جديد مقرطسينه بقرطاس
نفسي على الفكسار ماهي قريبه
ددسن تروح وترجع بعقل وقياس
ولا موترن موتي بسرعه يجيبه
هذال ضاوي العتيبي
بيت الأسبوع
كتبه للصفحة الشاعر سميحان بن فهد السويدي حول أهمية مهرجان الجنادرية للتراث والثقافة وحفظه للموروث بصفة عامة: ويقول البيت:
تاريخنا موروث الآباء والاجداد
بجنادريتنا نشوفه ونختال
* نستقبل صدى هذا البيت بثلاثة أبيات فقط تدور حول أهمية المهرجان الوطني للتراث والثقافة ودوره في حفظ الموروث والتراث للأجيال القادمة وذلك على الفاكس 01/4871070 أو الايميل rb-khozama@alriyadh.com
مقترح لبيت الأسبوع القادم
بعث للصفحة الأخ سعود عائش الحربي من جدة موضوعاً لبيت الأسبوع القادم وهو حث شبابنا على عدم البحث عن عمل مكتبي فقط ومحاولة البحث عن عمل فني وصناعي ففيه خير كثير وبركة.