بيت وصدى

في الأسبوع الماضي كان بيت الأسبوع من طرح الشاعر علي رشيد الرشيد حول ازعاج راكبي الدبابات النارية ومضايقة المتنزهين والبيت يقول:
يا راكب الدباب شرّك على الناس
أصوات وغبار وتشويه بيئات
وكان رائعاً صدى الشعراء حول هذا الموضوع :
يا راعي الدباب منت ابن فرناس
أسرع من طيور السماء بلملفات
اغباركم بلمنتزه ماله قياس
وانتم تفننتم بتكبير الاصوات
انصحك قبل توقع الفاس بالراس
ترى النصيحة تنشرى بالفليسات
حميد الصاعدي - الرياض
إلى متى ممشارك في درب منحاس
وشلون لامريت تزعج بالاصوات
كنك برالي بالطرق متعب الناس
والى متى هالحال قلي سلامات
كن البعض من دون ذوقٍ ولا احساس
غباركم ما بين روحه وجيات
عبدالكريم بن خزيم - البكيرية
ياللي تخيف الناس ما عندك احساس
دايم مشاكل بين روجه وجيات
من سبتك ناسٍ من الخوف تحتاس
واللي على هالحال يلزم حراسات
أفعالكم يا ناس ما هي بنوماس
ليت برقابة صارمة مع غرامات
محمد عبدالعزيز الخنيفر - أشيقر
يا سايق الدباب خل عندك احساس
خلك مكانك لا تعدى محلات
ناس تجي تبغى الوناسة والانفاس
اذيتهم في كل شبر حزات
وحادثك لامنه حصل ماله اعساس
نبي السلامة وان تحمد سلامات
حمد عبدالله الوايلي - حوطة سدير
يا راعي الدباب ما عندك احساس
من زين صوته يوم يجعر بلفات
مارس نشاطك بالصحاري والاطعاس
رالي بحايل كان تبغى البطولات
لابد من رادع يدقلك الاجراس
يرتاح منك الناس وتصير عبرات
موافق محيميد الشراري
يا راكب الدباب لا تزعج الناس
قضيت وقتك بين روحه وجيات
دوك الشوارع عجة ما لها قياس
وشكمان دبابك علا كل الأصوات
اظن ما بك شيمه وعقل واحساس
رح للبراري وكل ما عندك فهات
مبارك محمد بن طرجم - الدواسر
بعض اللعب ما فيه عيب ولا باس
لكن له حد وله بعد أوقات
يا راكب الدباب ما عندك احساس
أزعجت خلق الله بروحه وجيات
أن كان تبغى البسط وأيضاً رضا الناس
عن جمعهم خلك بعيد مسافات
ناصر بن جمعان آل عوض - وادي الدواسر
للناس من يزعج ترى مابه إحساس
يملوثين الجو في كل الأوقات
ضايقتوا المرتاح واللي شكى الباس
بالبيت والشارع وبر استراحات
واللي صبر جوّه تعكّر وينحاس
ما ينفعه صبره ولا فاده اسكات
فهد بن عقيل الطويان - بريدة
يا راكب الدباب لو عندك احساس
خلك بعيد من العوايل مسافات
راعو شعور المجتمع وسط الاطعاس
تفحيط مع سرعه بعدها وفيات
أشكالهم وألوانهم غير الأجناس
أدعو لهم يأهل العقول الرزينات
باتل سالم القحطاني - الرياض
وصيةٍ للكل من صميم الراس
إعلم ترى الحسنة تزيل السيئات
يا من بدبابك تكدر صفو الناس
لغير أماكن من تنزه به جهات
ويا أهل الرأي حطو المثل ذا اساس
مع المراقب طبقوا مخالفات
سعود عائش الحربي - القاهرة
يا مربك الطرقات اتعبت الناس
لابد نكشف عليها ونشوف وش ذا المحركات
كن صوتها انفجار لغم والا طلقة في الراس
راعيها ما يبدي أي اهتمام ولا مراعات
عبدالعزيز بن محمد الجبيري - الرياض
بيت الأسبوع
حول مقترح موضوع العنوسة للشاعر ناصر جمعان آل عوض من وادي الدواسر أرسل للصفحة الشاعر حمد عبدالله الوايلي هذا البيت حول الموضوع:
استفحلت حال العنوسة بذا الجيل
وفات القطار ووالي الأمر طماع
نستقبل صدى هذا البيت بثلاثة أبيات فقط تدور حول موضوع العنوسة وطمع أولياء الأمور وعزوف الشباب، ترسل على الفاكس 4871070 أو الايميل rb-akozama@alriyadh.com
مقترح لموضوع بيت الأسبوع القادم
بعث للصفحة الأخ لافي عامر منيف العتيبي موضوعاً لبيت الأسبوع القادم وهو موضوع تسيب العمالة وتركهم العمل عند كفلائهم.