بيت وصدى

الأسبوع الماضي كان بيت الأسبوع من طرح الشاعر حمد الوايلي من حوطة سدير حول موضوع الالتزام بالوقوف الصحيح عند الإشارات الضوئية المرورية ومدى الازعاج الذي تسببه العشوائية وقلة الوعي والبيت يقول:
الزام مسارك من يمين وشمالي
وبالك تعيق السير عند الاشاره
وقد كان صدى البيت أكثر من رائع والطرح أروع من شعراء رائعين:
بعض البشر يا للأسف ما يبالي
ويلف من اقصى اليمين الى يساره
ويعمل لسير المركبات اختلالي
لما يديدور خارج عن مساره
ما يدري ان الروح والدم غالي
خسارة يا كبرها من خساره
مبروك سالم بن ماضي - الرياض
لا جيت تمشي خل مشيك عدالي
ومخالفك القانون ما به شطاره
ولياك تسرع دام مالك مجالي
النار تولع دايم (ن) من شراره
ما ينفعك جاه (ن) واصلن ومالي
لو كنت سواق (ن) وصاحب مهاره
أحمد بن ناصر المحرج - الرياض
السايق اللي للسياقه مثالي
ما يقبل الفوضى ولا هي خياره
عند الاشاره وقفته بعتدالي
صف قبل خط المشاه ومساره
هذا دليل الذوق والفهم عالي
صوره لكل الناس فيها حضاره
مقرن بن متعب الهرف - الرياض
اليا وقفت أوقف بشكل مثالي
واضبط امورك حيل عند الاشاره
لا تقول أبا وقف على كيف بالي
عط الطريق حقه ورتب مساره
وقف صح ولا تقول كنت سالي
والعذر في هذي ما هو شطاره
سلطان سعد السهلي - المجمعة
خلك مثقف بالقيادة ومثالي
ترا السواقه ذوق وفن ومهاره
واربط حزامك واستعد بعتدالي
ولا تزود السرعه تراها خساره
تفقد بها عمرك وشوف العيالي
ويمكن تلز النفس على انتحاره
منيف بن عزيز الراشد - حائل
لا تصير مثل اللي مشى ما يبالي
لبس ايتنقل ما يجود مساره
قام ايتمرد لا حصل له مجالي
ما همه الا الدندنه والاثاره
ياللي تبون الصح امشوا عدالي
لا تجعلون المال كومة خساره
علي رشيد الرشيد - رياض الخبراء
السايق اللي لا مشى ما يبالي
ما يستحق الرخصه ولا الاستماره
يا السايق الممتاز خلك مثالي
لا تسبب ازعاج البشر والاثاره
خلك نظامي يا كريم السبالي
لساهر يراقبك في كل حاره
دعيج بن عبدالله المسردي- المنطقة الشرقية
ترى القياده فن والروح غالي
لا تبلش الآخر وتغلق مساره
ولا توقف والاشاره تلالي
مد واستمر ثم التخف بالوقاره
واحذر من السرعه وراع الهبالي
بعد المصيبه ما تفيد الجباره
علي آل زولان الفيفي - بيشة
من جاء يبي اليمنى تعيقه ويحتار
عند ظروف وانت مقفل مساره
اللي معه مرضان أو بعد مشوار
خلك نظامي وخل عنك القشاره
الزم نظام السير يا ولد الاخيار
واعرف ترى التعقيد ما هو شطاره
محمد بن عبدالعزيز الخنيفر - أشيقر
ابنصحك ولا تقول مالك ومالي
وقف بفن وذوق عند الاشاره
لا تسبب الربكه وخلك مثالي
وفي وقفتك عند الاشاره شطارة
يا طيب فالك يا المواطن وفالي
اليا التزمنا بالنظام بمهارة
سعد سلطان السهلي - المجمعة
خلك نظامي دوم مشيك عدالي
ما ضاع من ناظر يمين ويساره
وخلك وسيع بطان في كل حالي
والمخطي اقبل زلته واعتذاره
فهد بن عقيل الطويان - بريدة
احذر من اللي سرعته في العلالي
ما يدري ان الرفق فن وشطاره
عند التقاطع طايش ما يبالي
روحه رهنها للحوادث خساره
ترى التهور يفقدك كل غالي
ولا تنفع الحسرات من عقب غاره
عبدالله محمد آل مسلم - حوطة بني تميم
بيت الأسبوع القادم
كتبه الشاعر محمد عبدالعزيز الخنيفر تجاوباً مع مقترح الأخ محمد بن غصن حول موضوع وجود بعض المصانع السامة والضارة للإنسان بجوار الأحياء السكنية.. ويقول البيت:
المصانع في بلدنا نحييها
وبعدها مطلوب عن وسط الاسكاني
نستقبل صدى البيت بثلاثة أبيات فقط تناقش قضية وجود هذه المصانع الضارة للإنسان والمطالبة بإبعادها عن الأحياء السكنية وذلك على الفاكس (4871070) أو الايميل rb-khozama@alriyadh.com.
مقترح لموضوع بيت الأسبوع القادم
الزيادة المفاجئة في فاتورة الكهرباء وعدم الدقة في قراءة العدادات.