صوت الصورة

الباص وقف بوسط السيل
وعدو على السطح ركابه
سواقه اللي بحاجة شيل
من خوفهم غاص بثيابه
فهد بن عقيل الطويان - بريدة
يا الله تنجينا من الطبعه والغيل
ونرجع لاهلنا سالمين المخاسير
مدري طوشة بحر ولا حدر بنا السيل
يا لله تعجل فزعتك بالمناعير
عبدالله بن فهد الدوسري - الرياض
الحافله تعطلت داخل السيل
وركابها هجو من الخوف للسقف
لو تنجرف ولا الكفر صابه الميل
طاحو واصيبو في الدراكيل والجرف
سعود بن عبدالعزيز الهزاع - نعام
من بعد جده جانا طوفان الرياض
والمشكله هذي تكرر من سنين
شوارع فاضت مثل روس الفياض
وصرف المجاري حلها يا مسلمين
حمد عبدالله الوايلي - حوطة سدير
الباص غرقانن ولا فيه حيله
واشوف ركابه على السقف يومون
ودي اساعدهم ولابه وسيله
من يوصل الواير أو ملي يجرون
هادي شبيب الدبالين - الخرج
تصريف مويتنا تبين وفاحي
أوله في جده وتاليه بالرياض
والباص شوف العين من السيل راحي
والناس فوقه مثل جالس على انقاض
خالد بن ناصر المخيمر - روضة سدير
جاك الغرق يا راكب الباص من فوق
شف لك على مخرج ترى الباص يخذلك
لاتندته تنفعك لا صار بك عوق
وحتى اللساتك لا تحرّى تزبنك
عبدالله بن عمر بن سعود - الزلفي
صورة العدد عدسة - عبدالله الوحداني
أشوف ناس ماتبالي بالارواح
ولا تجعل لحق الطريق اعتبارا
من سرعته كنه مركب له جناح
وسط المدن وسط الشوارع تبارا
عبدالرحمن بن سعود آل حاتم - الرياض
القارب اللي كان قبل الوبل ..باص
تطامر الركاب فوقه يصيحون
استغربوا ..سواقهم صار غواص
في لجةٍ باليم خطراً يطيحون
سعد الحماد - روضة سدير
سقت نجد السحايب في دقايق
وصار الوضع فيها شبه غارق
طفت بعض المراكب بالطرايق
وتعلّق فوقها عشرين عالق
سارة العمر –الرياض
كثر المطر والسيل خطراً بعينه
جانا غرق في ليل عشنا بظلما
ونقل الجماعي صار مثل السفينه
يشيل ركابه على السطح بالما
أحمد نايف العصيمي - الرياض
يا جماعة افزعوا للحافله
العماله فوقها وسط الغدير
كلمة قلته ولا هي مجامله
افزعوا للي صغير قبل الكبير
محمد بن صالح الأطرش - رياض الخبراء
الماء أحاط بهم من دون الغير
يطلبون الله ثم جهود المسعفين
ياسايق الباص لا يخبط عليك القير
انقذ خويك مد له حبلٍ متين
صالح بن ابراهيم السنيدي - الحريق
يا رب يا منجي الغريق
طالبك يا ربْ من فضلك
أطلبكْ يا ربي التوفيق
ما يغتني العبد عن عدلك
غازي قاعد العتيبي - الدوادمي
الحق ياولد اركب الباص
لا يجرك الما وسيله
باصنا شرّق وغاص
ورجال الأمن راح تشيله
محمد عبدالله رجب - الرياض
تجمعوا هالناس فوق الغماره
خوفٍ على أرواحهم لا يغرقون
في وقتٍ به الأمطار تهطل غزاره
من عقبها توهقوا كيف يمشون
ماجد محمد الطواله – الرياض
نستقبل مشاركاتكم الشعرية على الفاكس 4871070
أو الايميل الخاص بصفحة الخزامى:
RB-khozama@alriyadh.com
زاوية (صوت الصورة) ونرحب
بالصور الهادفة والطريفة .. ويا هلا