صوت الصورة

يا راعي الدباب بالهون.. بالهون
أعطف على حالي ترى الحال تعبان
أطلق سراحي ثم نعطيك مليون
الموت ما حبه ترى السوق مليان
عبدالرحمن بن منصور التركي - البكيرية
أرجوك يا مسلم عليها ترفق
ترى الضحايا ما تقدر بالأثمان
كم واحدٍ غيرك عليها يتشفق
والله أمرنا نحسن الذبح باتقان
إبراهيم بن مرشد آل مغيرة - ضرماء
ركبت بالدباب عارف مصيري
هذا مصيري يوم عيد الضحيه
يا ليتني يا ناس طيراً يطيري
هذا طريق الموت جاب المنيه
عبدالمحسن بن محمد المحيسن - رياض الخبراء
طربان من شكله على السيكل يسوق
فاق النعيمي والسواكن والحرش
من ساع شفته قلت ما شا الله سبوق
يا حظ هاك المشتري خلف الكبش
عيده مبارك عاده الله بالحوق
على جميع المسلمين ديمه ورش
علي جابر آل زولان الضيفي - بيشة
شايل خروفك فوق دباب طاير
واللي وراء متمسكن فيك بالحيل
لو طاحوا الاثنين أصبحت حاير
وياما يجيك من الغثا .. والبهاذيل
خالد بن ناصر المخيمير - روضة سدير
الكل ضحى بيوم العيد
واليوم أدوّر من يذكيها
والكبش جنبي ما هوب أبعيد
والله يسهّل نيسويها
عبدالكريم عبدالرحمن السلوم - القرائن
يا ليتكم يا ناس ما تذبحوني
غيري كثير وانتم اليوم تدرون
على البراري مغرمٍ واتركوني
خوفي من السكين والقلب مخزون
محمد عبد العزيز الخنيفر - أشيقر
خروف حملك على دباب
ومردف رديفك ومعتاشي
طالع مسارك ولا ترتاب
وركز على الخط يا ماشي
حمد عبدالله الوايلي - حوطة سدير
مسكين يا راكب الدباب
تحسبك رايح لبريه
يبي يوديك للقصاب
يفرح بكبده ومشويه
محمد عبدالعزيز اليوسف - الرياض
أشوف سيكل شايلٍ له ثلاثه
خروف عيد مشترينه اثنيني
ما دري هي قلّة فهم ولا خباثه
رجلين من فوق الطلي راكبيني
زبن مقبل العنزي - بريدة
هي سنةٍ حتى على أهل الفراري
ياشايلٍ ضحيته فوق دباب
لو إنك بقيمة ضحيتك شاري
دتسن تسد إلى حضر حزم كلاب
عبدالعزيز الصالح - حائل
ياشينكم ياللي على الدباب
سواقكم يوم النحر تذبحونه
دزو لنا صيخ من اللحم يا حباب
ومن المرق قبل تقضونه
عبدالكريم النغيمشي - الربيعية
صورة العدد
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
زاوية ( صوت الصورة )
ونرحب بالصور الهادفة والطريفة