صوت الصورة

مرحباً بالعيد في يوم النحر
ثاني الأعياد يا محلى مجيه
اشترينا الكبش ما عابه عذر
اقبله يارب من عبدك ضحية
ثلث بناكل وثلث توزيعه أجر
وثالث الأثلاث فالسنة هدية
ناصر جمعان آل عوض - وادي الدواسر
يا مجود النجدي ترفق بحاله
أرفق بحاله لا تغوله وهو حي
راع الحلال اللي يهمه حلاله
ما يهمله بالشمس دور له الفي
شريكة له في معيشة عياله
يوفر لها البرسيم والرعي والمي
جميل بن محمد العنزي - الرياض
من حلاتك قلت صعبة اشتريك
النظر يكفي عسى عزك يدوم
لو تبيني، كنت تسمحلي أجيك
لكن أسعارك زيادة وما ألوم
لو أكيد تخفيض سعرك، ابتديك
وآكلك يا فرحتي وانسى الهموم
شامي أصلك أو نعيمي افتديك
والتيوس «مدفون» وبطني له يصوم
يا خروفي السموحة.. مبتليك
بس أشوفك، كل ساعة وكل يوم
ياسر بن سالم باجسير - الرياض
راعي الحلال يفرح لا أقبل العيد
ويفرح لا شاف بالسماء لمعة بروقه
ويجي له الداني واللي من بعيد
ويجلا مزاجه ويحلا بعد سوقه
ويبيع حلاله بالسعر اللي يريد
والمشتري يأخذ حلاله على ذوقه
فهد الفيروز - عنيزة
يالله عسى الحجاج يكتب لها الخير
وتزور مكة والمشاعر هنية
ومن بعدها تذبح لها الهدي وتسير
ترجم وتحلق يوم عيد الضحية
تذبح لها كبش سمين ولا هو صغير
يشبهك يا كبش الجريدة شوية
خالد بن ناصر المخيمر - روضة سدير
هذا خروف الضحية كامل الأوصاف
تفقده من عيوبه قبل دفع الثمن
تخيره واشتره من بد كل الخراف
والله أمرنا انتخيّر كل كبش حسن
يا ذبحة وزعه على كل الصحاف
خلها صدقة الرحمن وانت المؤتمن
عقلا خزن العنزي - تبوك
يا شاري منا الضحية تقدم
هذي ترى المطلوب لا تتركونه
إن فاتتك يا صاحبي اليوم تندم
عجل ترى العربان حولي يبونه
أسعاركم فيها الغلا وتجلب الهم
يا طالبين الخير لا ترفعونه
محمد بن عبدالعزيز الخنيفر - أشيقر
بالله تجمل راعني فالضحية
واصبر على جيبي الآن خالي
طحت في أزمة ظروف قوية
حملن سمع وأنشد جميع ازملالي
مرتب إحدا عش تأخر عليه
واليوم أنا عندك ترى الظرف صالي
علي جابر الزولاني الفيفي - فيفا
علّموا الرجال من يجلب خروفه
موسمه أقبل في عيد الضحية
النجد في نجد يا رجل معروفه
عزك الإسلام يا نجد العذيه
سهلوا الطرق ما عاد به كلوفة
احمد الله يوم دولتنا قوية
شبيب حمود جلهم القحطاني - المزاحمية
أرجوك يا راع الطلي ثم أرجوك
هذا الطلي لعيد الضحية نريده
كم الثمن والكاش موجود فالبوك
حدد سعر باللي تشوف وتريده
أقولها والسعر لو زاد متروك
متروك لك وانت الولد والوليده
سعود بن سعد الحافي - الرياض
يا صفحة خزامى الصحاري كم ايسام
أبافرق السومه وأجيكم أدور
وإن كانه مطابق تعاليم الإسلام
نويت أضحي بالسمين المصور