صوت الصورة

قرّب العيد وبشري لنا كبشٍ سمين
نذبحه للأهل والأصحاب والطيبين
يا هلا باللي لفونا وجونا معيدين
مثلكم يستاهل وحنا نكرم الغانمين
ناصر بن جمعان الدوسري - وادي الدواسر
لوني صغير أدخل مع الناس بالسوق
أشري وأبيع ولا عليا ملامه
واللي يجلّب يطلب العز من فوق
يرجي من الرحمن ستر وسلامه
أحسن من اللي أغلب الوقت مزنوق
يشكي الفقر كسلان ما اشين كلامه
عبدالكريم بن ابراهيم بن خزيم - البكيرية
عز الله إن ذاك الولد يعرف الزين
اختار من بين الغنم واجب الضيف
السوم كم وأنا أدفع الفرق ميتين
وادفع لك رسوم العلف والتكاليف
حدد مكانك واسألك موقعك وين
وأجيك أنا لو هي دروبك مطاريف
سعود بن سعد الحافي - الرياض
يا شاري الخرفان لا يغلبونك
خلك فطين وانتبه يابن الاجواد
خص ليا جاء العيد ما يجهلونك
أسعارهم تزداد في وقت الأعياد
وعند الشرا تحتارهم يتعبونك
أم الشحم تنهار من كثر الاجهاد
محمد بن عبدالعزيز الخنيفر - أشيقر
يوم شاف الغنم واليد على الشاة حطه
قال يابوي خذها هذه أحسن ذبيحه
هذه أحسن ذبيحة في حراج المحطة
وكان ماخذتها يابوي بالرأس صيحة
قال يابوي بالموتر على طول حطه
لاجل هالوقفة اللي بالطفولة صريحة
جلعود لافي الشمري - حائل
عاش من عينه على الكبش السميني
عاش من هاذي مباديه وصفاته
طفلٍ نظراته لها معنى ثميني
نظرة عيونه تكلّم عن براته
الله إنه يسعده دنيا وديني
وفقه ربه وطوّل في حياته
سلطان بن حمد الحبابي - الطائف
العيد قرب والذبايح بوسط السوق
والورع وده يشتري له ذبيحه
يا ورع أبعد شوي ترى الطلي مطفوق
لا ينطحك والا يغثك بريحه
قلبك لنيل المرجلة صار محروق
وإلا اخوانك بوسط فرشهم مستريحه
خالد بن ناصر المخيمر - روضة سدير
بالله ممن يا راع الضان
سلف ذبيحه على الراتب
الدين واجد وأنا طفران
ومن طبعي أقوم بالواجب
عادتنا نكرم الضيفان
ورغم الخسارة أنا كاسب
محمد عفار المطيري - عنيزة
الولد وسط الغنم مشتهي يأكل لحم
ما سكنه خروف سمين وفطيح
وفلونزا الطيور أرفعت سعر الغنم
وعذاب المشتري من غلاها يصيح
عازم له ضيوف كارهم الشحم
يالله إنك تعين كل وجه فليح
عقلا خزن العنزي - تبوك
أربعة رياجيل والخامس طفل
عند الغنم هم حاضرين
ما رجاهم إمصورنا وصل
جاب صوره إتساوي صورتين
وين راع الغنم وشهو حصل
ما يوقف إلياجو مشترين
مسعود عزيز الحزيمي - الجمش
يا ورع أنا تراي يا أبوك أبا أنصحك
نصيحة مني بصدق ولباقة
أنخش عن الخروف من قبل ينطحك
تراه خبلاً ما يعرف الصداقة
عز الله أنه رابح من سرحك
مع الشياه ومع أول نياقة
ذاكر دروسك واطلب الله يصلحك
تنجح ونأخذ لك من الورد باقة
زبن مقبل العنزي - بريدة
ليا الصغير ابعد ترى منت ملزوم
عن الخروف اللي اقرونه شطيره
لو يلتفت لك شرّح الجلد واهدوم
وأبوك من خوفه يضيع إتعبيره
خلك مع ادروسك ولا تبعد الحوم
وباكر تشوف العز في كل ديره
فهد بن عقيل الطويان - بريدة