صوت الصورة

ماشي على رجليه والحر زايد
ومغطياً راسه بجملة كراتين
رجل صبور وضاري بالشدايد
والصبر مفتاح الفرج والله يعين
عقلا خزن العنزي - تبوك
شهر المحبه والتراويح والصوم
شهر العطايا والكرم من صفاته
محشوم من شال الكراتين محشوم
أبشر براعي الخير حلت زكاته
سعد الحماد - روضة سدير
من فوق متنه شال خمسة كراتين
والزود شاله باليسار ويمينه
سوق التمر جولة من البعد شارين
إما شرى وإلا عطى مشترينه
فهد بن عقيل الطويان - بريدة
ياليتني حول هالشيبه
وأفزع وأشيل الكراتيني
يا حيث له عندنا هيبه
وقدره على الراس والعيني
عبدالكريم بن عبدالرحمن السلوم - القرائن
الشايب اللي شايلن له كراتين
ما عاب تحميله وهو جد العيال
وياعاطل مالك عمل فالقوانين
ماتمنعك لو بالشرف صرت حمال
سعود بن عبدالعزيز الهزاع - نعام
يا عود يلي فوق كتفك كراتين
تشيلها شيل الجمل للثقالي
تمشي مع الشارع بوسط الميادين
مرفوع راسك يوم رزقك حلالي
عبدالله محسن العجمي - ضرماء
عقب الغلا بالسوق صرنا نتاجر
نبيع ما نلقى ولو كان كرتون
ذي شغلتي من عام حول المناجر
أدور وأجمع رزق وافر ومضمون
عبدالكريم النغيمشي - الربيعة
يا مدور العيشة بجمعه الكراتين
أفطن ترا بعض الكراتين ضخمات
جعل الولي يرزقك ياذا المسكين
تجيب لك مصروف بيتك ريالات
علي الغنام - ثادق
يارجل يا مزود على الحمل حملين
وأنتا بعرض الدرب يا خوك مخطور
ما طارت الدنيا ولا لاحقك الدين
أما قضيت اليوم والا انت معذور
صالح عبدالعزيز السويح - روضة سدير
ياللي على الشارع تشيل الكراتين
أفطن لنفسك وأنتبه لا تبيده
جنب دروب بها الناس عجلين
والرزق عند الرب يكفل عبيده
محمد بن عبدالعزيز الخنيفر- أشيقر
أثقلت ظهرك بالجمل والكراتين
ناصي بها السوق في وقت الخرافي
الله معك يا فلان بالعسر واللين
هذا عمل معروف حلّه وصافي
عبدالمحسن بن محمد المحيسن - رياض الخبراء
يا عم وش عندك على جمع الكراتين
أنت بتشد ولا كثيره زكاتك
ولابهن تجني محصول البساتين
والظاهر أن بهن تالي حياتك
سامي بن حسين الهذلول - البدائع
جملة كراتين على كتف شايب
ناصي بها سوق التمر ربه يعين
قلبه على كسب الريالات ذايب
يصرف على الورعان ويوفي بهن دين
خالد بن ناصر المخيمر - روضة سدير
أحنيت رجلي خلف موظف وتوظيف
وأصبحت عاطل ما حصل لي وظيفه
قلت أشتغل أجيب كسرت رغيف
جوع وعطش والحال عندي كسيفه
حمد عبدالله الوايلي - حوطة سدير
يا عم شاري لك مقاضي كثيره
خفف حمولك كان فيها مجالي
الله ينور لك دروب سفيره
وتوصل عيالك وأنت سالم وغالي
بشائر القحطاني - الرياض
الحمد لله ما على الخلق متكال
دام الرزق مكتوب فوق الجبينا
لقمة شرف تغنيك عن مد واذلال
قول النبي الحق حكمه ودينا
دهام بن محمد دابس - تبوك
نرحب بمشاركاتكم الشعرية حتى مساء الاثنين على الفاكس رقم 4871070أو الإيميل الخاص بصفحة الخزامى:
khozama@alriyadh.com
زاوية: (صوت الصورة).. وياهلا