اللغز

الأسبوع الماضي كان لغز الأسبوع من طرح الشاعر محمد بن صالح الأطرش من القصيم والذي يقول:
انشدك عن ورع حياته بالاسفار
والا استقر هذا نهاية حياته
معكوس لاسمه واجب فيه الاذكار
والجمع منه أنواع تذكر صفاته
وقد توصل للحل شعراً:
يا مرحبا يا طارح اللغز يالجار
جاري وعرف الجار دامت حياته
اللغز حله ظرف مع فرض واختار
جالك جواب اللغز بانت صفاته
محمد بن عبدالرحمن أبو دحيم
دورت حل اللغز وادير الافكار
واخذت لي لحظة وبانت صفاته
يا مرحبا والظرف حافظ للاسرار
وليا وصل راعيه حانت وفاته
غادة بنت عبدالله السلطان، الرياض
يا مرحبا يا كاتب اللغز باشعار
لغزك وصلنا يا هلا ما حلاته
اللغز حله ظرف يمشي للامصار
كم مرة بالسوق نلقى رفاته
سليمان بن إبراهيم الفرحان
يا مرحبا واعداد هتاف الامطار
باللي بنى لغزه وبين وفاته
الظرف حل اللغز حفاظ الاسرار
واللغز حله دايم هي حلاته
عبدالله الأطرش، الرس
لغزك يبو صالح موكل بالاخبار
يذكر به المرسل لغيره وصاته
ظرف الرسالة حامل فيه الاسرار
ولا انفتح هذيك حزة وفاته
علي رشيد الرشيد، رياض الخبراء
ساعي البريد يودي علوم وأخبار
كم واحد وصاه وودّى وصاته
وسط الظروف اللي بها ختم وشعار
ووسائل التطوير سوت سواته
- باني بن فايز السبيعي، الأحساء
حياك يا رجال وشلون الأخبار
والا بغا الرجال يوصل وصاته
الظرف ما مثله لتوصيل الاسرار
اوقف على الصندوق وافتح دهاته
فالح غازي الحربي
* كما توصل للحل نثراً:
وليد الحربي - القصيم، فالح بن غازي الحربي - رياض الخبراء، طلال الغاوي - القصيم
لغز الأسبوع
كتبه عامر بن ناجي الحنتوشي من ساجر ويقول:
يا ويش عود يا عرب بالطيب يعرف ومخبور
ومن طاب حظه من عباد الله تسمو بولده
العود دايم في محله لا يلف ولا يدور
والا الولد عبر الغضا ياصل ديار بجهده