اللغز

الأسبوع الماضي كان لغز الأسبوع من طرح الشاعر محمد فرحان الفهيدي الحربي من القصيم والذي يقول:
انا بنشدك عن بنت تسير وجسمها معدوم
واثرها بالوطن يوجد حقيقه خلقها عبره
ترافق من يطيع الله وتمشي مع يهود الروم
ولا سيطر عليها الا رجل قد صار في قبره
وقد توصل للحل شعراً:
نبي حل اللغز من قبل ما تغرق عيون بنوم
ةميل الطرق وابياته بها الافكار معتبره
يسيرها نبي الله بامر ربه بجنب غيوم
هذيك الريح تثير الرمل والتربان والغبره
فالح غازي الحربي - رياض الخبراء
اخذت شوي افكر في معاني اللغز ياشغموم
ولا ظني يحله كود شاعر من هل الخبره
تراها ريح خالقها هو الله واحداً قيوم
تسير بدبرته سبحانه الى دبر الدبره
محمد بن سعد اليحيى - الدوادمي
هلا يا مرحبا بالمسك والكادي مع اليشموم
تحية وافيه ومعطره مكتوبه في حبره
هي الريح وعرفناها بوارحها تجيب سموم
لك الله عجها عجه ولا ندري وش الدبره
صلاح بن عبدالله اليابس - رحيمة
الا ياللي كتبت اللغز ولغزك واضح ومفهوم
ولا ياصل لحل اللغز غير اللي معه خبره
ترا حله هبوب الريح وسلم ياعساك اتدوم
على ما يامر سليمان تمشي طوع من جبره
حبيب الشامي - البدائع
الا يا محمد الحربي ترى حل اللغز مفهوم
وانا برمع ورمعاتي نتاج العلم والخبره
اقول الريح حل اللغز دايم فالبلاد تحوم
وهبها الله سليمان النبي بايديه منجبره
مصلح بن تركي بن مرزن - الجمش
هلا يا مرحبا في صفحة خزامى الصحارى دوم
ترا ما كل من غاص البحر ياتيك بالدره
وانا ما جيتك ياهل اللغز الا وانا معزوم
تهب الريح وطيور السماء في الجو مفتره
مسعود بن ويران ال دمنان - الأحساء
هلا ترحيبتن تحمل عبير الورد واليشموم
بها ريح الخزامى والخزامى عالين قدره
ترى لغز الفهيدي يا جماعه ما يباع بسوم
هذيك الريح بأمر الله تسير وتتمثل لأمره
عايض المويعزي
هلا يا مرحبا بك يا محمد والسلام يدوم
تحيه وافيه واهل الخزامى عندهم خبره
نشارك ربعنا في حل لغزك ما يبليه حوم
تراه الريح لا اشتدت يضيع الرأي والدبره
علي الرشيد - رياض الخبراء
انا قلت انها ريحن تهب البرد والسموم
تحط الجو ونكانت قويه كتمه وغبره
انا هاذي علومي ولبشر كلن يجيب اعلوم
وهاذي دبرت لله دبرته ما غيرها دبره
سعد صنهات السهلي - الدرعية
امرحبا بك يا محمد والعلوم علوم
اعرف اللغز من وصفه واعرف الصوت بالنبرة
نبي الله سليمان اسلمت له كل ريح تعوم
ذكر في محكم التنزيل مهو من واقع الخبرة
ساير فالح الحنيني الحربي - الخرج
عرفت البنت تمشي مالنا في وقتها معلوم
ترى الله من يمشيها ولا لاحد بها قدرة
طلبنا الله يخليها رياح ولا بريح احسوم
وهبها الله نبي ولا حد غيرة له الدبرة
عبدالله الرفيعي - البكيرية
كما كانت هناك حلولاً للغز على وزن آخر:
قبل أمس وأمس وقبلهن يوم واليوم
فكرت بحل اللغز وكشفت سبره
وهبت عواصيف الفرح برق وغيوم
سبحان من تجري العواصيف بأمره
زبن مقبل العنزي - بريدة
الريح حل اللغز يا الفهيدي عندنا معلوم
الريح معجزه وانته حكيم الراي والخبره
محمد أبودحيم - البدائع
لغزك يا راعي اللغز واضح ومفهوم
ما يبدعه غير راع الفن والخبرة
حله ترى النملة مع النبي المعصوم
من بفتح المصحف يلقى بها عبره
سعد مبارك الكودري - بيشة
لغز الأسبوع
كتبه للصفحة الشاعر أحمد بن ناصر المحرج من الرياض ويقول:
الا يا ويش رجل ضابط واقف وهو مستور
بمفرق وقفته له دور ولا احد ينكره لله
ولو يغفل ولو لحظه يجيب العيد ياهل الشور
ودايم راسه لا سفل بعزه مابها ذله
نستقبل الحلول على الفاكس (4871070 /01) ويفضل الارسال عبر الايميل rb-khozama@alriyadh.com