اللغز

الأسبوع الماضي كان لغز الأسبوع من طرح الشاعر عبدالله الصالح الأطرش والذي يقول:
أنا بنشدك عن بنت تصيد اللي ردى حظه
لها عين ومربوطة ولا توجد بديرتنا
لها فعل الابين عليها الناس مكتظة
نجيب ألغاز مليانة ولا نبخل بعادتنا
وقد توصل للحل شعراً:
هلا يا مرحبا ترحيب أغلى من الفضة
لبوصالح ومليانه الفازه دوم سرتنا
ألا يا قشر حظ اللي تصيده يا قشر حظه
تراها المشنقه يا ربعنا ما يوم مرتنا
صلاح بن عبدالله اليابس - رحيمة
هلا بلغزك يبو صالح ذهب ما يصرف بفضه
تبي بنت بها يحكم بعيده عن شريعتنا
تراها المشنقه تظلم وعنها الناس منفضه
يدوم العز لأمتنا بتمسكنا بسنتنا
فهد بن عقيل الطويان - بريدة
إلا مني قريت اللغز اجيب الحل في لحظه
اقول المشنقه حله وهاذي هي افادتنا
طريقه تخنق المخطي طريقة يا عرب فظه
وسنتنا بحد السيف وتمشي به حكومتنا
عزيز صالح الرميح - عنيزة
بنيت أبيات بالأطرش كما الألماس والفضه
نحب انشارك ابحله وتنشر فوق صفحتنا
نراها المشنقه حوله يجي صيحات مع جضه
لا هي بديارنا توجد ولا تعرف ببيئتنا
علي رشيد الرشيد - رياض الخبراء
ياشين المشنقة واللي تصيده ياردي حظه
تروح ارواح باسبابه بعيدة عن طريقتنا
تشيل المجرم، أبفمها أمام الناس منقضه
تجينا أخبارها دايم ولاهي في شريعتنا
محمد ابودحيم - البدائع
لقيت اللغز مازون بناه اللي قوى حظه
قويته بالخزامى واضح في وسط صفحتنا
وقول الحل مشناق على الأعناق لاعظه
ماهو بديارنا يوجد ولاهو في ديانتنا
فالح غازي الحربي - رياض الخبراء
هذيك اللي مع المذبح لها شيصه لها عظه
ولا فيها من الرحمة مثل مافي شريعتنا
هذيك المشنقة ولت بعدها الناس منخطه
عسى ابستر الولي نحيا وتموت ابستر لا متنا
سالم البشري
كما توصل للحل نثراً: عبدالرحمن محمد - الخبراء، محمد هذال الدوسري.
لغز الأسبوع
كتبه للصفحة الشاعر صلاح عبدالله اليابس من مدينة رحيمة ويقول:
انشدك عن رجل تلوت به فتاه
لين أصبحت يا ربعنا فوقه تويق
صارت دليل البنت يامال الغناه
تشوفها وسط البلد حول الطريق
نستقبل الحلول على الفاكس 4871070أو الإيميل Khozama@alriyadh.com
كما نرحب بطرح الألغاز الجيدة والواردة.