اللغز

الأسبوع الماضي كان لغز الأسبوع من طرح الشاعر سالم البشري من الجبيل والذي يقول:
أنا بنشدك عن بنت وجوده عاق له مخلوق
لها وقفة تعوقه لا بغى شفه ومطلوبه
وسيلة جابها رجل يريد الخشر بالمرزوق
والا حضرو هل الخشرة خذو كبسه وراحوبه
وقد توصل للحل شعراً:
هلا يا مرحبا واهلا هلا باللغز واهل الذوق
هلا عبر الخزامى اللي تشد الناس بأسلوبه
وحل اللغز ما يبطي معي واظن حول الفوق
هي الشملة ترد اللي يبي من در مشروبه
منيف سعد الشريهي - الرياض
إذا جاء يوم هالجمعه لفا لغز الخزامى ذوق
وتراث أجدادنا ما نتركه لو غيرو ثوبه
وحل اللغز يا سالم شملة بالنوق
وخذ حلي وابي ينثر وكل يلتفت صوبه
ظويهر عنيزان الشمري - الرياض
قريت اللغز واعجبني وجبت الحل بالماثوق
وعساي برمعتي ما اخطي وتلبس رمعتي ثوبه
هذيك الشملة اللي للحوار تصير حد وعوق
عسى الله بالحيا يرحم ديار بان عذروبه
دخيل الحسيني - الرياض
هلا يا صفحة خزامى الصحاري والأدب والذوق
هلا يا منبر الصفحات كل يلتفت صوبه
ودوك اللغز يالبشري وفي حله ماني مسبوق
هي الشملة ورمعاتي مهي بالقرم مغلوبه
ناصر بن هديرس - الرياض
هلا يا سالم البشري هلا وجاك الخبر موثوق
هلا بصفحة خزامى اللي بها الألغاز مكتوبة
البنت إشمالة الناقه عسى أرضه للرعد وإبروق
يشملها الذي شارك إحواره در محلوبه
فهد بن عقيل الطويان - بريدة
سلام الله على من عدو الصفحة وراحت فوق
وسلامي أيضاً لبشرى واشيد اليوم بأسلوبه
لقيت البنت مصنوعة تشمل به ديوس النوق
حليب البل معروفٍ يحب الناس مشروبه
علي رشيد الرشيد - رياض الخبراء
ألا يا مرحبا باللي عنده أسلوب وعنده ذوق
ولا يهون من يقرا والكل عندي ما جوبه
الحل شمالة الناقة تعوق الحاشي المخلوق
شفت الحاشي يحلحلها ويحاول ياصل مطلوب
محمد بن عبدالرحمن أبودحيم - البدائع
هلا يامرحبا باللي نشر لغز بفن وذوق
على الصفحة قرينا ما نشر والناس دريوبه
ترى الشملة هي التي تمنع العاشق من المعشوق
وترى تلقاه باللي زاهيه دلة ودبدوبة
نجم الشمري - الجوف - قارا
كما توصل للحل نثراً كل من محمد عفار المطيري - عنيزة، ثامر سند الشمري - الرياض، فلاح لافي العنزي - عرعر، خليفة مروي الرويلي - حفر الباطن، هلال ملفي رفاع المطيري،متعب محمد الحماد العنزي .
لغز الأسبوع
كتبه للصفحة/ ياسر محمد الرفاع ويقول:
انشدك عن ورع تشوفه مع أمه
ولا تعرف أمه لين معها تشوفه
إذا اخطت امه بالخطا ما يهمه
وإن كان صابت ثابت في وقوفه
نستقبل الحلول على فاكس رقم 4871070 خزامى الصحاري - زاوية لغز الأسبوع.
كما نرحب بطرح الألغاز الجيدة والجديدة.