اللغز

الاسبوع الماضي كان لغز الاسبوع من طرح الشاعر عبدالهادي بن حربوش القحطاني والذي يقول:
ابنشد اللي عندهم للغز حل
ياويش رجل له مهمة وله حين
بمهمته داوم عليها ولا مل
ومهمته تعجز كبار السلاطين
اذا ابتدى بمهمته كنه احول
واذا انتصف بمهمته صافي العين
وقد توصل للحل شعراً كل من:
يا مرحبا واللغز كامل مكمل
اجاد في وصفه واهلاً وسهلين
لو كان يزعل راعي الوصف الاول
هو القمر ياليت هو يمي الحين
صلاح بن عبدالله اليابس - رحيمة
سلام عبر الفاكس يطبع ويرسل
لصفحة خزامى والادارة وقارين
واللغز حله دايم الدوم ماكل
يظهر على وجه البسيطة من سنين
نشاهده بأول شهرنا ليا هل
وليا اكتمل نصف الشهر كمله زين
علي المشيعلي - المدينة المنورة
يا مرحبا عبر الصحارى مرسل
ترحيبة ما تنحصى بالملايين
واللغز واضح ما يبي له محلل
اوضح من الواضح بليا تخامين
هذا الهلال اللي يلامن بدا هل
والى انتصف في دورته يكتمل زين
مبارك محمد طرجم الدوسري - وادي الدواسر
يا كاتب الالغاز هد وتمهل
واخذ جواب كاتبه لك ابيتين
هذا «القمر» ويشابه القوس لهل
واذا انتصف هيض قلوب المحبين
مشاري خالد الدعجاني - شقراء
اللغز يا القايل عرفنا له الحل
هذا القمر له طلة تطرب العين
يصعب علينا شوفته كل ما هل
لا كن نشوفه واضح بعد يومين
د. سعد بن محمد الرامي
هذا جوابي عبر الاوراق يرسل
كل النشاما للخزامى محبين
اللغز بعد اسبوع يعلن له الحل
واليوم حله مثل ما يوصف الزين
هذا القمر معروف له شكل لا هل
والى انتصف يسطع الى جوك سارين
علي رشيد الرشيد - رياض الخبراء
لغز الخزامى عبر الاوراق ياصل
واللغز هين للرجال الفهيمين
من يوم شفته بالجريدة ينزل
قلت القمر لا بان يا زين هالعين
يطل يم الغرب صغير لا هل
ولا انتصف يضرب به الوصف للزين
فالح بن غازي الحربي - رياض الخبراء
يا مرحبا بالي بلغزه توصل
تنفح حروفه من قطوف الرياحين
وجه القمر ياما بوصفه تغزل
اجمل واجمل في قلوب المحبين
هذا جوابي ولك مني اجمل
واغلا تحية كل حين وراء حين
مختار حنش السعيدي - الرياض
حربوش لغزك باقي ايام ويطل
يعلن قدوم الحج لصاحب الدين
وهو الهلال اللي به الوقت يندل
تعرف به شهور السنة كلها زين
جعلك تشوفه دايم بخير ويهل
وديارنا بأمان من حيناً لحين
فهيد بن سحلي المغيليثي - الرياض
هذا القمر يا حلو نوره الى طل
ونور القمر يبهج نفوس الملايين
يفرح به السمار والخل للخل
وتضرب به الامثال من ماضي اسنين
الله على وقت نخبره الى هل
قبل الكهارب والقمر نورنا الزين
جلعود بن لافي الهمزاني - حائل
كما توصل للحل نثراً كل من:
فايز بن سعد آل فهد من الخرج، سلطان محمد عبود العضياني - الرياض، ماجد مطر الشمري - الجبيل، سارة السنيدي - الشماسية.
لغز الاسبوع
كتبه لصفحة خزامى الصحاري الشاعر سالم البشري من الجبيل ويقول:
أنا بنشدك عن بنت وجوده عاق له مخلوق
لها وقفة تعوقه لا بغى شفه ومطلوبه
وسيلة جابها رجل يريد الخشر بالمرزوق
والا حضروا هل الخشرة خذو كسبه وراحو به
نستقبل الحلول على 4871070 خزامى الصحاري - زاوية اللغز كما نرحب بطرح الالغاز الجيدة والجديدة.