اللغز

كان لغز الأسبوع الماضي من نظم الشاعر جمعان بن حشر الدوسري من وادي الدواسر ويقول:
ياويش رجلٍ دايم الدوم ظميان
يشرب ولا يروا ولو كان شايب
حلقه تحت بطنه ولا فيه كرعان
عجايبٍ ياويشهي من عجايب
وقد توصل للحل شعراً كل من :
يامرحباً باللغز من نظم جمعان
يوم الخزامى تنشره للحبايب
حله مهو صعب وأنا أقول محقان
الله يكفينا شرور المصايب
علي رشيد الرشيد رياض الخبراء
لغز جميل وقاله الشيخ جمعان
يشرب ولايروا ولاهوب تايب
ولاهوب مناخٍ على نار ديوان
محقان ولاتوخذ عليه الظرايب
بدر خلف الخزيمي
مع الخزامى كل جمعة لنا شان
ألغاز واشعار بها البال طايب
اللغز حله حسب الاوصاف محقان
يشرب ولا يرويه كثر الصبايب
سعود عائش التميمي الحربي- جدة
يامرحبا بك عند ربع لهم شان
واللغز وارد ياعسى الرمع صايب
محقان يحقن به زيوت ودهان
محقان يحقن كل ماكان رايب
سالم البشري -الجبيل
حي اللغز يوم أعتنى فيه جمعان
وحي التواصل بين كل الحبايب
يالدوسري فكرت والحل محقان
يشريه راع الزيت وأهل الحلايب
عبدالرحمن عبيد العازمي- الخبراء
يامرحبا بأهل الخزامى وجمعان
اللي كتب لغز يبي حل صايب
هذا بلا شك ولا أجدال محقان
جبته يوم إن الكيف رايق وطايب
صالح بن عبدالله التميمي- الرس
حي الله من عده وحي الله جمعان
في صفحة الألغاز مع الحبايب
لغزك نحله أبشر.. الحل محقان
وأسم وسلم على باقي القرايب
صلاح بن عبدالله اليابس - رحيمه
في خاطري المحقان ياشيخ جمعان
والعلم عندالله وسيع الوهايب
ويالله أنا طالبك ماصير غلطان
يامنشي الجانب ونود الهبايب
علي جابر الفيفي- فيفا
جمعان لغزك يابن الأجواد مليان
أرسلت حله واعسى الحل صايب
يا واردين الماء بحبل ومحقان
صبوا لنا الكبد فيها لهايب
عبدالرحمن ناصر الجابر- عنيزة
عبر الخزامى أرسل سلامي لجمعان
إعداد ما ذعذع نسيم الهبايب
واللغز حله يافتى الجود «محقان»
يوجد مع أللي يركبون النجايب
محمد بن فهد العنزي- الرياض
كما توصل للحل نثراً كل من الأخ طارق علي القحطاني من الرياض، والأخ عبدالعزيز عبدالله العريني من الرياض.
لغز الأسبوع
نظمه الشاعر صالح بن عبدالله التميمي من الرس ويقول:
في كل ديره ياعرب يذكرونه
يضر وينفع للذي له يجوني
عجيب لاشفتوه ما تاكلونه
وإن كان ماشفتوه له تاكوني
نستقبل الحلول على الفاكس 4871070 صفحة «خزامى الصحارى» زاوية «اللغز» كما يسرنا أن نرحب بتواصلكم الجميل وبألغازكم الجديدة والمفيدة. وياهلا بالجميع.