اللغز

الأسبوع الماضي كان لغز الأسبوع من طرح الشاعرعلي رشيد الرشيد من رياض الخبراء والذي يقول:
أنشدك عن رجلين في وزن وقياس
متشابهين الحجم والشكل واللون
الاسم للواحد والاثنين لا باس
عدال والا عكس تراه موزون
وقد توصل للحل شعراً كل من:
أهلاً هلا واعداد ما هب نسناس
لمحرّر الصفحة مع اللي يحلّون
واللي كتب لغزه على بيض قرطاس
ترى الكبك حله بلا شك وظنون
عبدالله صالح الأطرش - الرس
يا مرحباً حييت يا طيب الساس
إعداد ما يسجع من الورق بلحون
لغزك كبك موجود مع جملة الناس
يبدا بكاف وكاف باخره تقرون
دغيم الخمشي - القصيم
إخذ الجواب اللي من الراس للراس
يا صاحب الوالد عسى كودها هون
تلقا الكبك بالسوق في عدّة أجناس
اللغز وارد والجماعة يحكمون
حبيب سالم البشري - الجبيل
يا مرحبا يا علي من قلب واحساس
لغزك جميل وحلنا اللغز مضمون
هذا الكبك ما فيه باس على الناس
معروف واللي يفهمونه يعرفون
محمد الناصر العريني - رياض الخبراء
شبيت نار أبي الوناسة والاوناس
وارسلت عيالي للجريدة يجيبون
لغزك «كبك» وينشاف مع أكثر الناس
يابو رشيد اللغز جيد وموزون
تركي عبدالله العريني - البدائع
يا مرحباً حييت يا طيّب الساس
ترحيبة تاصلك والناس يقرون
هو الكبك ينشاف مع جملة الناس
وأسلَم وسلّم لي على من تعزون
صلاح بن عبدالله اليابس - رحيمه
لعز الخزامى ناشرينه على ساس
أبيات حلوة والنشاما يحلون
تراه معشوق ويشرونه الناس
هو الكبك ما فيه شك ولا ظنون
فالح غازي الحربي - رياض الخبراء
أغلى تحية عد ما هب نسناس
وأعداها همال تحدر من أمزون
الحل واضح كان ما خاب هرجاس
هذا الكبك باطراف الأكمام مضمون
طلال فالح الحربي - القصيم
الحل صيد ونابه الفكر قرناس
وراع الهدد باللغز مولع ومفتون
لو غاب تدعيه الخزامى على ساس
يبث شوقه و(الكبك) صيد مضمون
فهد الجروان - الزلفي
حيّا الله اللي لا بنا جوّد الساس
بنيه عجيب ويلفت أنظار مليون
بلس الكبك حنا ترانا أكثر الناس
طاح المطر وأثنوا على والي الكون
سالم البشري - الجبيل
يا مرحباً حييت ما هب نسناس
وأعداد من حجوا بمكة يلبون
هذا الكبك واسمه كما قلت لا باس
الحل وصلك بالخزامى ومضمون
علي بن عمر الخراسي - عنيزة
يا بورشيد اللغز جبتوه بقياس
يجمع أطراف الكم والحل مضمون
هذا الكبك والكم لو ضاع ينحاس
وصفحة خزامى بالإجابة يهلون
محمد بن عبدالرحمن أبو دحيم - بدائع
اللغز واصح للبايب من الناس
حله كبك إن كان للحل تبغون
بعض العرب حطه على الكم نوماس
وبعض العرب ما يبلسونه يعيفون
محمد عقيل الزغيبي - الأحساء
قريت لغزك يا علي فوق قرطاس
لغز الخزامى اللي مقفى وموزون
ذاك الكبك اللي يحطونه الناس
بأطراف كم الثوب والحل مضمون
ناصر بن عبدالله الدعيجي - قصر ابن عقيل
يا مرحباً بك عد ما هب نسناس
يا علي بن رشيد والعلم مضمون
فصلَّت ثوب العيد يا طيَّب الساس
والكم سادة أو كبك وش تقولون
شبيب بن هذال السبيعي - الرياض
حيا الله اللي صاغ لغزه من الراس
حياه رب البيت حياه مليون
وعرفت لغزك يا علي عقب هوجاس
ناس تريد أكباك والبعض بدون
مطرف ناصر الحبابي - الخرج
حياك رب البيت عدد كل نسناس
يالي كتبت اللغز حياك مليون
وعرفت حل اللغز واخذه من الراس
ذاك الكبك ما غيره اللي تقصدون
علي بن سلمان المشاري - الرياض
علي نظم امر على العين والراس
وشلون ما أجاوب على اللغز وشلون
كبك ونبغا أشكال وألوان وأجناس
هذا جواب اللغز والحل مضمون
علي غنام الغنام - رياض الخبراء
علي هلا ما لاح برَّاق الأدماس
عبر الخزامى الحل ياتيك مضمٌون
ذاك الكبك شدَّوه فكَّوه بلباس
والناس في رغباتهم دوم يمشون
فهد بن عقيل الطويان - بريدة
كما توصل للحد نثراً كل من: ظويهر بن عنيزان الشمري - الرياض، متعب فريح التريباني - الرياض، سعدون راضي العنزي - عرعر، هلال سمنان بادي العتيبي - الرياض، فالح غازي الحربي - رياض الخبراء، طلال فلاح الحربي - القصيم.
لغز الأسبوع
كتبه: عواض بن ضاوي الحربي من الرياض، ويقول:
يا ويش عذرا مالها خير أو شر
وجودها مع البشر ما له أساس
توجد مع اللي يشيلها جهر وسر
ومن شالها تنسب لغيره من الناس
نستقبل الحلول: على فاكس 4871070
صفحة خزامى الصحارى - زاوية اللغز
كما نرحب بطرح الألغاز الجيدة والجديدة